Koreja Veriore duket se ka testuar një raketë balistike të martën, që mund të ketë aftësi më të mira se raketa hipersonike që e lëshoi para më pak se një jave, tha ushtria e Koresë Jugore.
Testimi i këtyre raketave e nënvizon zotimin e udhëheqësit Kim Jong Un për Vit të Ri se do ta forcojë ushtrinë me teknologjinë më të avancuar në kohën kur bisedimet me Korenë Jugore e Shtetet e Bashkuara kanë ngecur.
Sipas vlerësimeve fillestare, raketa e lëshuar të martën fluturoi më shumë se 700 kilometra, në lartësi maksimale prej 60 kilometrash, me shpejtësi maksimale deri në dhjetë herë më të lartë se shpejtësia e zërit (12.348 kilometra në orë), thuhet në deklaratën e Shtabit të Përgjithshëm të ushtrisë së Koresë Jugore.
“Ne vlerësojmë se kjo është më e avancuar se rekata që Koreja Veriore e hodhi më 5 janar, ndonëse autoritetet e inteligjencës nga Koreja Jugore e Shtetet e Bashkuara janë duke kryer analizë të hollësishme”, tha ushtria e Koresë Jugore.
Raketa e dyshimtë balistike u vërejt rreth orës 7 e 27 minuta nga provinca Jagang e Koresë Veriore drejt oqeanit në bregdetin lindor të saj, në vendin e njëjtë ku u testua një raketë tjetër javën e kaluar, shkruan Reuters, përcjell Gazeta Express.
Koreja Veriore është bërë pjesë e garës botërore për zhvillimin e raketave hipersonike, të cilat zakonisht përshkruhen si armë që lëvizin pesë herë më shpejt se zëri dhe që mund të manovrojnë në trajektore relativisht të ulëta, duke i bërë ato shumë më të vështira për t’u përcjellë ose për t’u penguar.
