72 policë të rinj nga radhët e komunitetet joshumicë kanë nisur punën në fillim të kësaj jave në veri të vendit. 45 nga këta policë janë nga komuniteti serb. Por vetëm pak kohë pas nisjes së detyrës, ndaj tyre nisi një fushatë linçuese nga përdorues serbë të rrjeteve sociale
Në Policinë e Kosovës bënë të ditur se 45 prej tyre janë nga komuniteti serb, 16 nga ai boshnjak, 8 nga komuniteti rom, ashkali dhe egjiptian, si dhe tre turq.
Veton Elshani, zëvendësdrejtor i Policisë në Mitrovicën e Veriut, tha se policët e rinj janë shpërndarë në gjithë territorin e veriut të Kosovës.
“Nuk dihet nëse numri i tyre do të rritet gjatë ditëve në vijim. Ndërsa policët e rinj do të vazhdojnë të stërviten edhe për dy apo tre muajt e ardhshëm”, tha Elshani.
Me të marrë detyrën e re, përdorues serbë të rrjeteve sociale e nisën një fushatë linçuese ndaj policëve të rinj nga ky komunitet.
Pesë syresh u janë publikuar fotografitë dhe emrat në platformën ruse, Telegram, teksa është paralajmëruar edhe publikimi i fotografive dhe emrave të të tjerëve.
Policët e rinj janë pjesë e grupit prej 418 kadetësh të diplomuar në Policinë e Kosovës.
E kryeministri Albin Kurti ua ka uruar marrjen e pozitës pjesëtarëve të rinj të policisë.
“Të sapodiplomuar në Policinë e Kosovës, zyrtarët nga komunitetet joshumicë kanë filluar punën këtë javë në veri të vendit. 45 nga oficerët janë serbë, 16 boshnjakë, 8 romë, ashkali dhe egjiptianë dhe 3 turq. I falënderojmë për shërbimin e tyre dhe i urojmë suksese”, tha Kurti.
Fillimnëntorin e vitit të shkuar, policët nga radhët e komunitetit serb u larguan nga ky institucion. Dorëheqja e tyre e pasoi suspendimin nga detyra të drejtorit të Policisë për rajonin e veriut, Nenad Gjuriq, shkaku i refuzimit të tij për ta vënë në zbatim vendimin e Qeverisë së Kosovës për riregjistrimin në RKS të veturave që posedonin targa me akronime të qyteteve të Kosovës, të lëshuara nga Serbia.
