Pas “grupit kriminal” ‘SASPAC’, Ilir Beqaj merret i pandehur për 5 akuza

Teksa po përballet me drejtësinë për veprën penale të “vjedhjes duke shpërdoruar detyrën” dhe “grupit të strukturuar kriminal” për “Sterilizimin”, ish-ministrit Ilir Beqaj u mor i pandehur nga SPAK edhe për 5 akuza të tjera.

Prokuroria e Posaçme përfundoi hetimin e nisur për dosjen “SASPAC”, agjencisë që drejtoi pasi la Ministrinë e Shëndetësisë. Sipas SPAK, gjatë drejtimit të agjencisë që koordinonte fondet e Bashkimit Europian në Shqipëri Beqaj ka bërë korrupsion, ka shkelur barazinë në tendera, ka mashtruar, ka falsifikuar dokumente dhe ka fshehur pasurinë.

Të hënën ish-ministri u shoqërua nga paraburgim i Durrësit drejt SPAK, ku u njoh me akuzat në prani të avokatit të tij mbrojtës. Për të njëjtën çështje, SPAK vuri nën akuzë edhe Ermal Kurtulajn, Mira Topçiun, Bledar Lekën, Gazment Haxhinë dhe Elton Marinin.

Sipas SPAK, përgjatë viteve 2022-2023, kohë kur Beqaj ishte nën hetim për “Sterilizmin”, si drejtues i Agjencisë SASPAC më bashkëpunim me Kurtulajn dyshohet se ka abuzuar me të paktën 8 procedura tenderuese.

Nga hetimi ka rezultuar se fituesi ishte dakordësuar dhe përcaktuara para procedurës së tenderit dhe më pas janë kryer veprimeve fiktive për efekt dokumentacioni e pagese. Nga hetimi janë ngritur dyshime edhe për pasuri të padeklaruara të Beqajt, interesat pasurorë në një restorant pranë qendrës së Tiranës ku dyshohet të ketë investuar gati 100 mijë euro si edhe një automjet të regjistuar në emër të Ermal Kurtulajt.

Nga kontrollet e ushtruara për hetim në banesa dhe zyra shoqërish tregtare u sekuestruan edhe 47 mijë euro dhe700 mijë lekë. Pas komunikimit të akuzave, të pandehurit kanë 10 ditë kohë të paraqesin prapësime dhe më pas dosja depozitohet në Gjykatë për t’iu nënshtruar shqyrtimit paraprak.