Mitropoliti i Kishës Ortodokse të Malit të Zi (KPC) Mihailo shprehu pritshmëri që pasi Patriarkana Ekumenike e njohu Kishën Ortodokse Maqedonase – Arqipeshkvinë e Ohrit (MPC-OA), e njëjta gjë do të veprohet edhe me Kishën Ortodokse Malazeze (KMSH), pasi kështu do shpëtojnë nga ndikimi i Kishës Serbe.
Kujtojmë se Patriarkana Ekumenike ose e Konstandinopojës ka pranuar në mënyrë kanonike ish-Kishën Ortodokse Maqedonase nën emrin Kryepeshkopata e Ohrit në bashkësinë e kishës ortodokse dhe ka njohur Maqedoninë e Veriut si territor kanonik.
“Unë isha për dhënien e autoqefalisë Kishës Maqedonase. Kështu duhej bërë, por nuk kanë më merita se kisha ortodokse malazeze. Unë mendoj se (njohja) së shpejti do të jetë me kishën malazeze. Sepse pa kishën ortodokse malazeze shteti i Malit të Zi nuk mund të mbijetojë”, tha Mitropoliti Mihailo.
Ai theksoi se “ata presin autoqefalinë siç presin që Mali i Zi të jetë një anëtar i ri i Bashkimit Evropian (BE)”.
“Kështu do të jemi anëtarë të Kishës Ekumenike,” shtoi ai.
Sipas tij, njohja e kishave maqedonase dhe malazeze ngushton ndikimin e Kishës Ortodokse Serbe (KOS) dhe Serbisë në Ballkan.
“Duhet pasur kujdes që njëherë e përgjithmonë të zbulohet se Kisha Ortodokse Serbe, pra Serbia, nuk ka aq shumë ndikim dhe sulme ndaj vendeve përreth saj. Sepse nuk kanë miqësi me askënd. Kjo duhet të ndalet. Nëse vazhdojnë me këtë politikë për të rivendosur perandorinë e Dushanit, kam frikë se do të mblidhen në pashallëkun e Beogradit. Serbia e mban Malin e Zi si republikën e saj. Asgjë nuk mund të mbahet,” tha Mitropoliti Mihailo.
Ai pret se do të ketë përpjekje nga Kisha Ortodokse Serbe për të sfiduar pavarësinë e kishës maqedonase.
“Ata pretendojnë se Patriarkana Ekumenike nuk ka të drejtë të japë autoqefalinë.
Nuk ka Kishë Nënë, siç pretendohet. Këto janë histori. Nëse do të kishte një Kishë Nënë, nuk do të kishte Ortodoksi Lindore!”, është qëndrimi i Mitropolitit Mihailo.
Duke folur për qëndrimin e Kishës Ortodokse Ruse, me të cilën Kisha Ortodokse Serbe është e lidhur fort (të dyja kundërshtuan autoqefalinë e Kishës së Ukrainës), Mitropoliti Mihailo shtoi se qëllimi i gjithë kësaj është të ndikojë në Ballkan.
“Ballkani luan një rol të madh. Ky ndikim në Mal të Zi ekziston për 150 vjet…”, tha Mitropoliti Mihailo.
