Ylli i “YouTube” i kthyer në boksier, Jake Paul, la njollë të përhershme në trashëgimine e boksit të kampionit të dyfishtë të kategorisë së rëndë, Mike Tyson, me një fitore të zbehtë me pikë para 70 mijë shikuesve të frustruar në Teksas. Miliona njerëz e kanë parë meçin diskutabil në “Netflix”.
Tysoni, që nuk ka garuar për 19 vjet dhe që tani është 58-vjeçar, ishte vetëm hija e boksierit të dikurshëm.
Paul 27-vjeçar, që është fillestar në boks, e mbajti ikonën në distancë, duke dhënë goditje të sakta në meçin me tetë raunde nga dy minuta.
Tysoni ishte i ngadaltë, shkruan BBC. Ai u prit si hero para meçit, por kishte shumë fishkëllima kur lufta po shkonte drejt fundit. Disa tifozë u larguan para se të shpallej fitorja me rezultat 80:72, 79:73 dhe 79:73 në të mirë të Paul.
Kishte pikëpyetje për legjitimitetin e luftës dhe sa seriozisht do ta merrnin Tyson dhe Paul atë.
Dy boksierët mbanin doreza më të rënda, me mbushje shtesë, si pjesë e kushteve të vendosura nga komisioni i Teksasit, i cili e konsideroi luftën si profesionale. Vendimi duket edhe më qesharak pas fundit të duelit.
Dorezat më të lehta nuk do të kishin bërë asnjë ndryshim. Asnjëra prej goditjeve të bëra nuk i është afruar atyre që kërkohën për nokaut.Tysoni bëri vetëm 18 goditje në gjithë luftën, ndërsa Paul i kishte 78.
Paul është bërë i famshëm duke publikuar video me shaka në YouTube. I kishte 70 milionë ndjekës në rrjetet sociale para se të futej në boks.
Ai e zhvilloi luftën e 11-të profesionale. Shumë kanë vlerësuar se meçi ishte tallje me boksin dhe rezultati e dëshmon këtë.
