“PD ka hyrë në spirale shumë të rrezikshme”/ Nga Tritan Shehu tek Flamur Noka, ja qëndrimet e deputetëve demokratë për largimin e Berishës nga grupi parlamentar

Vendimi i kryedemokratit Lulzim Basha për përjashtimin e ish-kryeministrit Sali Berisha nga grupi parlamentar i PD-së ka sjellë reagime të shumta nga ana e demokratëve.

Mbrëmjen e sotme, Basha ka mbledhur anëtarët e kryesisë të PD-së brenda selisë blu, ku vendimi për Berishën ka sjellë debate të ashpra.

Kanë qenë disa deputetë të cilët kanë kundërshtuar ashpër vendimin e Lulzim Bashës. Burime për Panorama.al bëjnë me dije se kundër këtij vendimi janë deputetët Bujar Leskaj, Albana Vokshi, Flamur Noka, Tritan Shehu apo dhe Luçiano Boçi.

“Vendimi i gabuar, po mohojmë historinë”, ka deklaruar Noka. Ndërsa Tritan Shehu ka akuzuar Bashën për vrasjen e PD.

“Vrave PD-në. PD ka hyrë në një spirale shumë të rrezikshme. Një vendim i tille nuk mund të merrej nga vetëm një njeri, qoftë dhe kryetari. Duhej ta gjykonim sëbashku”, është shprehur Shehu.

Ky vendim është cilësuar si një shkelje e hapur e statutit dhe ligjit të PD-së ndërkohë thotë se ditën e nesërme do të jetë në Parlament.