“Pengjet të kequshqyer”, zemërim në Izrael: Duken sikur të ishin në një kamp përqendrimi

Imazhi i tre pengjeve izraelitë të lëshuar nga Hamasi ka shkaktuar reagime të forta. Ohad Ben Ami (56 vjeç), Eli Sarabi (52 vjeç) dhe Or Levi (34 vjeç) mbërritën në Izrael pas 16 muajsh robëri dhe fotografitë i tregojnë ata të dobësuar.

Sipas Ministrisë izraelite të Shëndetësisë, tre pengjet janë të kequshqyer dhe kanë humbur shumë peshë gjatë 491 ditëve të robërisë.

“Këto janë skena të vështira”, tha zëdhënësi i Ministrisë së Shëndetësisë Dr. Hagar Mizrahi në një konferencë shtypi nga Spitali Ichilov i Tel Avivit, ku po trajtohen dy nga pengjet e liruara.

Tre pengjet u shfaqën të dobët dhe të pafuqishëm kur u liruan, 16 muaj pas rrëmbimit të tyre nga Kibbutz Beeri dhe festivali i muzikës Nova. Por mjekët ishin gjithashtu “të emocionuar kur i panë ata duke ecur, në këmbë dhe krenarë”, shtoi zëdhënësi i Ministrisë së Shëndetësisë.

“Pengjet dhe familjet e tyre do të marrin një gamë të gjerë trajtimesh, të dizajnuara për të përmbushur nevojat e tyre fizike dhe emocionale”, shtoi Mizrahi.

Eli Sarabi është shfaqur me mjekër të trashë dhe kokë të rruar, pasi ka humbur shumë kilogramë. Gruaja e tij britanike, Liane Brisley, dhe vajzat e tij adoleshente, Noah dhe Yahel, u vranë pasi ai ra në duart e terroristëve.

Vjehrrit e Eli Sarabit thanë se ishin të tmerruar nga pamja e tij. “Unë mezi flas tani”, thotë Jillian Breezley i tronditur. “Ai duket sikur ka qenë në Belsen”, thotë Pete Breezley, duke iu referuar kampit të përqendrimit të Luftës së Dytë Botërore.

Me zemërim reaguan edhe disa politikanë ndaj pamjeve që pa sot e gjithë bota, por edhe qytetarë të thjeshtë në shumë vende.

“Izraeli nuk do ta harrojë imazhin e tre pengjeve të dobët, të cilët u morën në një platformë në Gaza dhe u detyruan të jepnin një intervistë të organizuar nga persona të armatosur të Hamasit përpara lirimit të tyre sot”, tha kryeministri izraelit Benjamin Netanyahu.

Presidenti izraelit Isaac Herzog protestoi kundër situatës së tre pengjeve të liruar, duke thënë se kjo përbën krim kundër njerëzimit dhe i bëri thirrje botës të veprojë. “Kjo është se si duket një krim kundër njerëzimit”, shkroi ai në një postim në X.