Gjyqtari francez në Gjykatën Speciale, Nicolas Giju, pritet të ia nis një letër drejtorit të Policisë së Kosovës, Samedin Mehmeti, për ta pyetur se cilat janë janë kapacitetet për zbatimin e një numri masash, në rast se krerët e Ushtrisë Çlirimtare të Kosovës të lirohen me kusht.
Krejt kjo, pas një vendimi të Gjykatës së Apelit e cila pranoi ankesat e avokatëve dhe urdhëroi gjyqtarin Giju që të kërkojë sqarime shtesë nga Policia e Kosovës.
Policia në një përgjigje për RTK-në, ka thënë se nëse kërkohen sqarime dhe garancë shtesë nga Dhomat e Specializuara, janë të gatshëm të bashkëpunojnë për gjithçka.
“Policia e Kosovës është në gjendje të zbatojë në të gjitha aspektet në praktikë vendimin/urdhrin gjyqësor të nxjerrë nga Dhomat e Specializuara të Kosovës, nëse një gjë e tillë kërkohet me urdhër gjyqësor kërkohet nga Policia e Kosovës”, thuhet në përgjigje.
Për avokatët në Kosovë, përgjigjja e Policisë mund të jetë vendimtare për lirimin ose jo me kusht të krerëve të UÇK-së.
“Është obligim i gjyqtarit të procedurës paraprake që të parashtrojë pyetje konkrete në drejtim të Policisë, në lidhje me zbatimin e kushteve që mund të imponohen në një vendim për lirim me kusht”, tha Çerkini.
“Gjykata nëse e aprovon lirimin me kusht mund të vendosë disa kufizime për të pandehurit, dhe do të kërkohet nga Policia që të jep garancione të qarta se mund ti zbatojnë ato masa në praktikë”.
Vendimi i Apelit, vlen njëjtë për Kadri Veselin, Rexhep Selimin e Jakup Krasniqin.
Kurse, për ankesën e Hashim Thaçit, ende nuk ka vendim publik.
Vitin e kaluar Gjykata Speciale ka ngritur aktakuzë ndaj ish-liderëve të UÇK-së, Hashim Thaçi, Kadri Veseli, Rexhep Selimi dhe Jakup Krasniqi, të cilët i akuzon për krime lufte.
