Persona të armatosur “gjer në dhëmbë” sulmojnë një burg në Meksikë, dhjetëra të burgosur arratisen

Dhjetëra të burgosur janë arratisur nga një burg në Meksikën veriore pasi persona të armatosur, të dyshuar si anëtarë të një karteli droge, hapën zjarr në objekt. Agresorët mbërritën jashtë burgut shtetëror Chihuahua pak pas orës 07:00 (14:00 GMT) me automjete të blinduara dhe filluan të qëllonin mbi rojet.

Sipas autoriteteve vendase, dhjetë persona u vranë, së bashku me katër të burgosur, gjatë sulmit brutal në qytetin kufitar të Ciudad Juarez. Policia thotë se rreth 24 të burgosur u arratisën.

Përleshjet brenda burgut, ku të burgosurit nga banda të ndryshme kriminale dhe kartele të drogës janë vendosur në blloqe qeli të veçanta, lanë gjithashtu 13 të plagosur. Katër prej tyre po trajtohen në spital, thanë autoritetet e burgut.

Jashtë u mblodhën të afërmit, duke u përqafuar dhe duke qarë teksa prisnin lajme nga njerëzit e tyre. Një grua tha se sulmuesit ishin të veshur me të zeza, ishin më të armatosur se policia dhe po qëllonin në çdo automjet që kalonte.

Ushtria dhe garda kombëtare janë thirrur për të mbështetur autoritetet lokale pas kësaj.

Qyteti ka përjetuar vite të tëra përplasjesh të dhunshme midis karteleve rivale të drogës Sinaloa dhe Juarez, duke vrarë mijëra njerëz në dekadën e fundit. Burgu ishte gjithashtu vendi i një kryengritjeje gushtin e kaluar, në të cilën një trazirë brenda burgut u përhap në rrugë, duke vrarë 11 njerëz.

Të dy incidentet nënvizojnë forcën që kartelet e drogës ushtrojnë ende në sistemin e burgjeve.

Pak minuta para arratisjes, burra të armatosur qëlluan mbi policinë në një rrugë aty pranë, duke nisur një ndjekje me makinë që përfundoi me katër burra të ndaluar.

Në një zonë tjetër të qytetit, dy shoferë të tjerë vdiqën pas asaj që zyrtarët e quajtën agresion të armatosur. Autoritetet nuk kanë thënë ende nëse incidentet besohet të kenë lidhje.