Personi që vrau 30-vjeçarin nga Kosova në Gjermani është shqiptar, flasin dëshmitarët që panë ngjarjen tmerruese

Skena si nga një film gangster kanë tronditur Hanoverin. Një shofer i “Porsche”-s u qëllua për vdekje në veturën e tij në një kryqëzim në qendër të qytetit, të enjten pasdite. Policia ende po kërkon autorin me shpejtësi të plotë. Supozohet se i dyshuari është një kontraktor, përcjell Bota sot.

Sipas raporteve të medias, policia identifikoi një të dyshuar pas mosmarrëveshjes fatale në qendër të qytetit Hanover. “Hannoversche Allgemeine” dhe “Bild” njoftojnë njëzëri se i dyshuari është një kontraktues ndërtesash 45-vjeçar.

Ai dyshohet se ka vrarë 30-vjeçarin shqiptar nga Kosova Armin Neziri.

Mësohet se i dyshuari Rinor Z, është gjithashtu shqiptar i Kosovës. Ai ka drejtuar një veturë të tipit “Mercedez Benz”, në momentin që është ndaluar në semafor, paralelisht me Nezirin, i cili ndodhej gjithashtu në një veturë të tipit “Porsche”.

Të dy janë përfshirë në një konflikt për motive që ende nuk dihen. Në sherr e sipër, Rinor Z. ka nxjerrë armën dhe ka qëlluar në drejtim të Nezirit, duke e lënë të vdekur këtë të fundit.

Zyrtarët e policisë speciale të armatosur rëndë shkuan në banesën në Langenhagen afër Hanover, për të cilën thuhet se ishte e Rinor Z. Por as burri, as gruaja e tij apo fëmijët e tyre nuk ishin në shtëpi.

Një zëdhënës i policisë konfirmoi se operacioni kishte të bënte me personin e vdekur nga qendra e qytetit Hanover.

Sipas dëshmitarëve, personi i dyshuar për vrasjen iku në këmbë pas të shtënave. Ata kanë thënë se dy veturat kishin ndaluar në një semafor dhe vozitësit patën nisur një debat të dhunshëm dhe më pas kishin pasuar të shtënat. Por, Policia ka thënë se ka pasur vetëm një të shtënë me armë.

Personi i vdekur thuhet se ishte në paraburgim në vitin 2017 – sepse ai qëlloi një burrë.

“HAZ” dhe “Bild” raportuan se i ndjeri ishte i njohur për policinë. Në vitin 2017, ai thuhet se kishte qëlluar një 25-vjeçar pasi pësoi plagë të rënda me thikë në një sulm ndaj tij. Ai u dorëzua një ditë më vonë, por u lirua nga paraburgimi katër javë më vonë.

Në atë kohë kishte dyshime se mund të kishte qenë një mosmarrëveshje në biznesin e drogës dhe prostitucionit. Është ende i paqartë motivi i vrasjes, por dyshohet të jetë hakmarrja.