Piloti kroat i KFOR-it i kapur si spiun, reagon Milanoviq: Nëse vërtetohet shkelja e betimit dhe dëmi ndaj Kroacisë, të ndëshkohet

Presidenti kroat, Zoran Milanoviq, ka reaguar për rastin e ndalimit të dy personave për spiunazh në Kroaci, një pilot të forcave ajrore kroate që kishte punuar edhe në KFOR dhe të dashurën e tij serbe nga Mitrovica, të cilët dyshohet se i shërbyen Serbisë.

Milanoviq tha se i mbështet të gjitha institucionet e vendit të tij për ndërmarrjen e veprimeve lidhur me këtë rast.

“Lidhur me fillimin e një hetimi kundër oficerit të Forcave të Armatosura Kroate J.I. (54) nën dyshimin për kryerjen e veprës penale të spiunazhit sipas Nenit 348, paragrafi 1 i Kodit Penal, Presidenti i Republikës Zoran Milanović shpreh mbështetje për të gjitha institucionet e Republikës së Kroacisë, kryesisht VSOA-n, të cilat kanë vërtetuar nëpërmjet veprimeve të tyre kryerjen e mundshme të veprave penale në dëm të Republikës së Kroacisë dhe kanë marrë masa të përshtatshme brenda juridiksionit të tyre me qëllim zbulimin e autorëve të mundshëm dhe parandalimin e veprave të mëtejshme penale”.
Në një komunikatë të publikuar nga Zyra e Milanoviqit thuhet se “Presidenti i Republikës është informuar në kohën e duhur për aktivitetet e institucioneve kompetente të ndërmarra në këtë rast dhe pret një hetim efikas që do të vërtetojë të gjitha faktet përkatëse”.

“Çdo anëtar i Forcave të Armatosura Kroate duhet ta kryejë detyrën e tij ushtarake me ndershmëri, drejtësi dhe ligjshmëri, dhe nëse vërtetohet ndonjë shkelje e ligjit dhe betimit të bërë, ajo duhet të ndëshkohet në mënyrë të përshtatshme”.