Kryeministri i Kroacisë, Andrej Plenkoviç, në një konferencë për media ka deklaruar se Kroacia është duke e shqyrtuar ngritjen e një padie të mundshme kundër Serbisë për reparacione të dëmeve të luftës.
“Çështja e reparacioneve të dëmeve të luftës dhe një padi të mundshme ndaj Serbisë është ngritur në nivelin bilateral. Ministritë dhe ekspertët janë të përfshirë në këtë proces. Ne s’e kemi harruar atë gjë. Është shumë e rëndësishme se Lufta për Atdheun tonë është përtej çdo diskutimi në Kroaci por edhe ndërkombëtarisht”, ka deklaruar shefi i ekzekutivit kroat.
Andrej Plenkoviç ka thënë se njerëzit e pagjetur në luftën e viteve 1991-95 dhe ata të keqtrajtuar në burgje, shteti kroat nuk i ka harruar.
Ndërsa thirrjen e Presidentit të Serbisë, Aleksandër Vuçiç ndaj serbëve për të shfaqur flamujt serbë kudo që ata janë, e ka cilësuar provokim edhe Kryeministri i Kroacisë, Andrej Plenkoviç.
Kjo pasi që 15 shtatori u shpall nga shteti serb si ditë e unitetit të popullit serb, si dhe ditë e flamurit. Të gjithë vendet ku ka minoritete serbe mbuluan ndërtesat, rrugët, muret, shtëpitë e bulevardet me flamuj serbë.
“Do të thoja përsëri, edhe atë me forcë të theksuar, se, këto veprime, përnga pikëpamja jonë nuk kanë tjetër qëllim përveç se të provokojnë vendet fqinje, e sidomos ata që janë më së afërmi”, ka deklaruar për media Plenkoviç.
Plenkoviç vazhdimisht ka qenë i zëshëm ndaj këtyre provokimeve të Serbisë, dhe ka konsiduerar që Kroacia duhet t’i reagojë.
“Ne s’biem pre e provokimeve por ndërtojmë marrëdhëniet më të mira të mundshme, duke qenë edhe të vetëdijshëm për trashëgiminë e së kaluarës, dhe barrat që janë bartur. Të ardhmes duam t’i qasemi konstruktivisht dhe me mençuri”, shtoi ai.
Veprime të këtilla, shtoi ai, “vetëm sa e thellojnë mosbesimin, i shqetësojnë marrëdhëniet, dhe mund të kenë pasoja në nivele lokale”.
