Shefi i stafit të presidentes së Kosovës, Vjosa Osmani, Blerim Vela, ka thënë se Ekipi Menaxhues dorëzoi një drafstatut për Asociacionin e komunave me shumicë serbe, që është shumë i ngjashëm me statutin e Vojvodinës.
Vela në “Twitter” ka postuar edhe faqe nga drafstatuti i propozuar nga Ekipi menaxhues dhe faqe të statutit të Vojvodinës, duke e bërë krahasimin.
“Synimi i tyre duket se është rikonstituimi i autoritetit autonom të Serbisë në Kosovë, njëlloj si Vojvodina, me synim të anulimit të institucioneve të Kosovës”, ka shkruar Vela, që ka thënë se ky draft s’do të kalojë.
