Presidentja Osmani në pritje të Kushtetueses, ende pa dekret për datën e zgjedhjeve

Presidentja e Kosovës, Vjosa Osmani, nuk e ka nënshkruar ende dekretin për datën e zgjedhjeve, me arsyetimin se është duke pritur nëse Gjykata Kushtetuese do të vendosë masë të përkohshme.

Bekim Kupina, këshilltar për media i Osmanit, njoftoi se presidentja ende nuk e ka nënshkruar dekretin për datën e zgjedhjeve sepse, siç i ka njoftuar edhe partitë në takimin konsultativ, ajo është në pritje të Gjykatës Kushtetuese.

“Nëse Gjykata Kushtetuese e vlerëson si të nevojshme caktimin e një mase të përkohshme, Presidenca e mirëpret atë, duke ritheksuar se masa në asnjë moment nuk paragjykon vendimin përfundimtar të Gjykatës lidhur me kushtetutshmërinë e dekretit”- ka njofttuar Kupina për media.

Lëvizja Vetëvendosje e ka dorëzuar sot në Gjykatën Kushtetuese, dekretin e presidentes Vjosa Osmani për shpërndarjen e Kuvendit të Kosovës.

Shefja e grupit parlamentar, Arbërie Nagavci njoftoi se kanë dorëzuar kërkesën e nënshkruar nga 30 deputetë, për vlerësimin e kushtetutshmërisë së dekretit të datës 06.03.2026.

Njëkohësisht, LVV ka kërkuar nga Gjykata që të vendosë masë të përkohshme për pezullimin e këtij dekreti, deri në nxjerrjen e aktgjykimit përfundimtar.

Në mëngjesin e 06.03.2026, presidentja e Kosovës, Vjosa Osmani, ka shpallur dekretin për shpërndarjen e Kuvendit të Kosovës pasi deri në përfundim të afatit kushtetues nuk u arrit të zgjidhet presidenti. Më pas ka mbajtur një takim konsultativ me kryetarët e partive në lidhje me datën e zgjedhjeve. Në takim nuk mori pjesë lideri i LVV-së, Albin Kurti.