Profesori amerikan: Kosova objektiv i hapur për Putinin, t’i mbajnë sytë hapur ndaj spiunëve rus

Profesori amerikan, Alon Ben-Meir, njëherësh edhe njohës i çështjeve të politikave në Ballkanin Perëndimor, ka thënë se Kosova dhe veçanërisht Ballkani Perëndimor në përgjithësi është target i presidentit rus, Vladimir Putin.

Ben-Meir, me anë të një postimi në llogarinë e tij zyrtare në ‘Twitter’, ka përshëndetur vendimin e Ministrisë së Punëve të Jashtme dhe Diasporës për shpalljen non-grata të një zyrtari rus të UNMIK-ut në Kosovë.

“#Kosova dhe vendet e tjera të Ballkanit Perëndimor duhet të qëndrojnë sy-hapur kur bëhet fjalë për infiltrime të mundshme të shpiunëve #rus. Ky rajon është objektiv i hapur për Putinin; vendet e tjera duhet t’i frikësohen më shumë afrisë së tij me #Serbinë”, ka shkruar ai në ‘Twitter’.

Ministrja e Punëve të Jashtme dhe Diasporës e Kosovës, Donika Gërvalla-Schwarz, ka shpallur person non-grata një zyrtar rus të UNMIK-ut në Kosovë për shkak të veprimtarisë së tij të dëmshme, e cila ka cenuar sigurinë kombëtare të Republikës së Kosovës.

Gjatë vitit të kaluar me kërkesë të presidentes së Kosovës, Vjosa Osmani, persona non-grata janë shpallur edhe dy zyrtarë të Zyrës Ndërlidhëse të Federatës Ruse në Kosovë për shkak të aktiviteteve të tyre të dëmshme për sigurinë kombëtare dhe rendin kushtetues të Kosovës.