Krimet Ekonomike të Policisë së Kosovës kanë arrestuar dje dy familjarë të Fikrim Damkës, ministrit të Zhvillimit Rajonal.
Gazeta Insajderi zbuloi se personat e arrestuar janë Anil dhe Sefçet Damka, të dyshuar për veprat penale “falsifikim i dokumenteve” dhe “keqpërdorimi dhe mashtrimi në prokurim publik”.
Lajmi është konfirmuar edhe nga Policia e Kosovës.
“Më 12.05.2022 janë arrestuar dy të dyshuar meshkuj kosovar, nën dyshimin se të njëjtit në bashkëveprim kanë kryer veprat penale të lartë cekura. Të njëjtit janë intervistuar dhe me vendim të prokurorit, njëri prej tyre është dërguar në mbajtje, ndërsa i dyshuari tjetër për shkaqe shëndetësore, me rekomandim të mjekëve është dërguar në QKUK në përkujdesje mjekësore dhe në sigurim të policisë”, ka njoftuar Policia.
Sipas policisë gjatë vitit 2021 pronari dhe i autorizuari i një biznesi kanë përfituar tender nga Institucionet e Republikës së Kosovës pa i plotësuar kriteret.
“Lidhur me rastin pas veprimeve hetimore është vërtetuar se të dyshuarit kanë paraqitur si referenca në dosjet e tenderëve në vitin 2021, referenca të cilat nuk i kanë fare të deklaruar qarkullimin në Administratën Tatimore të Kosovës dhe qarkullimin Bankar të Falsifikuar në një bankë, vlera e tenderëve të fituar sillet rreth 100,000.00 euro (një qind mijë euro)”, njofton Policia.
Prokuroria Themelore në Prishtinë tashmë ka paraqitur kërkesë për caktimin e masës së paraburgimit ndaj Anil e Sefçet Damka.
Që të dy ngarkohen me veprën penale “Falsifikimi i dokumenteve” dhe “Keqpërdorimi dhe mashtrimi në prokurim publik”.
“Referuar pyetjes suaj, ju njoftojmë se prokuroria për të njëjtit ka paraqitur kërkesë për caktimin e masës së paraburgimit, në drejtim të veprave penale “Falsifikimi i dokumenteve” dhe “Keqpërdorimi dhe mashtrimi në prokurim publik”, të parapara sipas KPRK-së”, thuhet në përgjigjen e Prokurorisë dhënë Insajderit.
Me vendim të prokurorit i dyshuari Anil Damka është dërguar ne Qendrën e Mbajtjes, ndërsa i dyshuari Sefçet Damka me rekomandim të mjekëve dhe në konsultim me Prokurorin e rastit për shkaqe shëndetësorë dërgohet për trajtim në përkujdesje mjekësore në sigurim të Policisë.
