Publicisti shqiptaro-amerikan: Ju bir qenësh që po e shani Amerikën, na thonë çfarë bëri BE për Kosovën këto 21 vjet

Pas përfshirjes së SHBA’së në procesin e dialogut Kosovë-Serbi, përmes përfaqësuesit të presidentit Trump, Richard Grenell, i cili po insiston në një marrëveshje të shpejtë, një pjesë e politikanëve, por edhe e opinion-bërësive, kanë filluar ta kritikojnë këtë qasje. Publicisti shqiptaro-amerikan, Uk Lushi, i cili ishte edhe pjesëtar i UÇK’së, ka bërë një reagim të ashpër ndaj këtyre kritikuesve, duke i quajtur edhe bir qenësh.

Lushi u ka bërë thirrje atyre, që të tregojnë se çfarë ka bërë BE në këto 21 vjet për Kosovën, ku pesë shtete vazhdojnë të mos e njohin pavarësinë, dhe vendin e mbajnë të izoluar.

Ai ka thënë se Amerika nuk është shtet i pallavrave, por punon. Këtë e ka lidhur me intensitetin shumë dinamik që i dërguari i presidentit Trump e ka futur në procesin e dialogut në mes të Kosovës dhe Serbisë.

Më poshtë lexoni të plotë reagimin e Uk Lushit:

I lexova disa qenë bir qenësh shqiptarë që paskan filluar ta sulmojnë Washingtonin e t’i hidhen në qafë Amerikës sa i përket Kosovës.

More kretenë, more bukëshkalë pa tru:

që nga viti 1999 kur u krye lufta çlirimtare, 21 vjet Europa dhe BE nuk bënë asgjë serioze as të bindin e as të detyrojnë Spanjën, Sllovakinë, Greqinë, Rumaninë e Qipron të njohin Kosovën shtet. E Serbinë hiç se hiç.

Asnjë veprim konkret që të përmbyllet çështja; veç zvarritje, improvizime, vonesa, ndërkaq që Kosova e izoluar natyrisht që, ngadalë, do të shpopullohej sepse në burg nuk jetohet krejt jeta.

Po të ishte njohur Kosova nga të gjitha shtetet e BE-së dhe të ishte vendosur në shtegun e integrimit politik the ekonomik, fakti që Kosova nuk do të ishte ende anëtare e OKB-së nuk do të ishte shumë relevant sepse jeta dhe shteti do të ishin kompletuar themelësisht dhe forcuar përmbajtësisht.

Amerika nuk është shtet i pallavrave. Po edhe Amerika gabon, por Amerika punon. Nuk çan d’rrasa përjetësisht. Një problem nuk mund zgjidhet vetvetiu duke vendqëndruar ad infinitum. Jemi me fat që Amerika ka interes dhe është duke u angazhuar që të gjendet zgjidhje përfundimtare mes nesh ehe Serbisë.

Ne duhet të angazhohemi që interesi dhe e drejta jonë të ketë ndikimin maksimal, jo të bëjmë si disa qenë bir qenësh shqiptarë që kanë filluar ta sulmojnë Washingtonin e t’i hidhen në grykë Amerikës sa i përket Kosovës.

Nëse nuk e doni Amerikën të ndihmojë, urdhëroni, dilni në ballë dhe le të marshojmë deri në Beograd! Ama e di që ju sharësit dhe fjalamanët as çizmet ushtarake nuk do t’i vishni, e armë nuk do të prekni kurrë me dorë. Prandaj shshshshshsh…!