Moska raportohet t’i ketë kërkuar Pekinit armë dhe ndihmë financiare pas pushtimit të Ukrainës, transmeton Gazeta Metro.
Kuptohet se Shtëpia e Bardhë është e shqetësuar se Kina mund të minojë përpjekjet perëndimore për të ndihmuar Ukrainën, sipas burimeve të cituara nga The Washington Post dhe Financial Times.
Megjithatë, ambasada e Kinës në Uashington thotë se nuk mund t’i konfirmojë këto raporte, duke shtuar se mbështet të gjitha përpjekjet drejt një zgjidhjeje paqësore të krizës.
Më herët, këshilltari amerikan për sigurinë kombëtare, Jake Sullivan tha se Kina do të përballet “absolutisht” me pasoja nëse ndihmon Moskën t’i shmanget sanksioneve të vendosura nga Perëndimi.
Ai i tha CNN: “Ne po i komunikojmë drejtpërdrejt, privatisht Pekinit, se do të ketë absolutisht pasoja për përpjekjet për shmangie të sanksioneve në shkallë të gjerë ose mbështetjen ndaj Rusisë për t’i plotësuar ato.
“Ne nuk do të lejojmë që kjo të shkojë përpara dhe të lejojmë që Rusia të ketë një rrugë shpëtimi nga këto sanksione ekonomike nga çdo vend, kudo në botë.”
Sullivan do të takohet me kryediplomatin e Kinës, Yang Jiechi, në Romë më vonë të hënën.
