Kryeministri i Shqipërisë, Edi Rama, ka kritikuar rëndë Bashkimin Evropian dhe politikat e saj karshi Ballkanit Perëndimor, në Samitin e BE-së që është mbajtur sot në Bërdo të Sllovenisë.
Rama ka publikuar në Facebook fjalimin e tij të plotë në këtë samit, ku ndër të tjera ka kritikuar BE-në për mospranim të Shqipërisë në këtë familje dhe për mosliberalizim të vizave për Kosovën.
“Po si i bëhet për shembull, për ekzistencën e 2 milionë qytetarëve të Kosovës ende të kyçur brenda në vendin e tyre, disa vjet pasi vendi i ka përmbushur të gjitha kriteret për liberalizimin e vizave? A nuk është surreale që ata mund të udhëtonin lirisht jashtë vendit të tyre, kur ishin nën një regjim brutal i cili u rrëzua me bombat e SHBA dhe BE, ndërsa sot ata janë të kyçur brenda nga vetë çlirimtarët e tyre? Meqë ra llafi BE-ja ka liberalizuar vizat për 52 milionë njerëz jashtë hartës së ardhshme të Unionit dhe jo vetëm përpara, po edhe pasi ajo vetë ka deklaruar, publikisht, se Kosova i përmbushi të gjitha kriteret teknike; madje përmbushi edhe një kriter pa lidhje, që iu kërkua shtesë, demarkacionin e kufirit me Malin e Zi. E di e di, është ajo që është”, ka thënë Rama.
Ai ka thënë me këtë rast se Bashkimi Evropian nuk është më i miri, por më të mirë se ai nuk ka.
Sipas tij, për këtë arsye edhe pajtohen me deklaratën përfundimtare të samitit, ndonëse siç ka thënë, askush nuk i pyeti për mendim gjatë hartimit të saj.
“Në fund të ditës, Bashkimi Europian nuk është më i miri, por më të mirë se Bashkimi Europian nuk ka. Kjo është edhe arsyeja pse ne pajtohemi plotësisht me deklaratën përfundimtare të samitit, edhe pse askush nuk na pyeti për mendimin tonë përgjatë hartimit të saj. Është ajo që është”, ka thënë Rama.
Ai ka kërkuar po ashtu që BE-ja të mos e ndajë Ballkanin Perëndimor nga planet e veta të emergjencave
“Le të shpresojmë që në këtë rast të ri krize madhore që na prek të gjithëve, qytetarët tanë nuk do të lihen nga BE-ja si peshq pa ujë, ashtu siç ndodhi kur na latë jashtë skemës së shpërndarjes së dozave të para të vaksinave, duke e detyruar rajonin tonë, që në një luftë të mirëfilltë për mbrojtjen e jetës të mbështetet tek të shumëpërfolurit aktorë të tretë, shprehimisht Kina, Rusia apo Turqia nëse e doni edhe me emra”, është shprehur Rama.
Udhëheqësit e Bashkimit Evropian, bashkë me shtetet anëtare, në Samitin e Sllovenisë, në konsultim me udhëheqësit e Ballkanit Perëndimor kanë nënshkruar një deklaratë të përbashkët.
Aty BE-ja thotë se ka përsëritur mbështetjen e saj për perspektivën evropiane të Ballkanit Perëndimor, ndërsa një pikë prej tyre i dedikohet direkt dialogut Kosovë-Serbi.
