Reagimi i kryetarit Elezaj për ndërtimin e Fabrikës së Çimentos, në Klinë

Qytetarët e komunës së Klinës janë shprehur të jenë kundër ndërtimit të fabrikës së çimentos, të cilët madje kanë bërë edhe një fushatë përmes rrjete sociale.

Derisa kryetari i kësaj komune, Zenun Elezaj, përmes një postimi të bërë në faqen zyrtare ka reaguar ndaj disa mediave të cilat sipas tij kanë lakuar edhe emrin e tij.

Elezaj ka thënë se ka takuar në lidhje me këtë çështje vazhdimisht qytetarët, duke iu ofruar përkrahje ndaj vullnetit dhe kërkesave të tyre. Derisa ka thënë se pëlqimi për ndërtimin e kësaj fabrike e ka dhënë qeverisja e kaluar.

Ky është reagimi i plotë:

Të dashur qytetarë, jeni ju ata që me anë të votës së lirë, më keni dhënë besimin e të parit të Komunës, nga e cila pozitë me pastaj të mbroj interesat e të gjithë juve, pa më të voglin dallim partiak apo çfarëdo qoftë.

Jam zgjedhur që të menaxhoj taksat e paguara nga ju në mënyrën e duhur, e duke i dëgjuar e shqyrtuar kërkesat e nevojat e arsyeshme të juaja, taksat e juaja të i drejtoj në projekte të cilat burojnë nga nevoja për një jetë më të mirë për të gjithë ne.

Është përmendur se për ndërtimin e fabrikës se çimentos është dhënë pëlqimi nga Komuna e Klinës.

Fillimisht sqaroj se Komuna më datë 26.12.2015, në kohën kur Komunën e ka udhëhequr PDK, Kuvendi Komunal ka miratuar Planin Zhvillimor Komunal (PZHK), ku në bazë të këtij plani Komuna edhe gjatë qeverisjes së kaluar ka pasur kërkesa dhe përgjigje të njëjta.

Duke u bazuar në këtë Plan Zhvillimor, Komuna mund të lëshoj pëlqim VETËM PËR RREGULLIMIN E DOKUMENTACIONIT PËR APLIKIM dhe për përputhshmërinë e aktiviteteve minerare me PZHK-në, ritheksoj të miratuar në kohën kur Komunën e ka udhëhequr PDK.

Të bashkangjitur e keni edhe një përgjigje që Komuna i ka dhënë kompanisë Sh.P.K. “KLINA-CEM” në tetor të vitit 2017, kur Komuna udhëhiqej nga PDK. Më saktësisht, atëkohë unë isha në balotazh si kundërkandidat i ish Kryetarit të Komunës. Pra në kohë fushate.

Akoma më keq, janë faktet të pamohueshme, plotësisht të vërteta dhe të argumentuara, se reagimet e Partisë Demokratike të Kosovës-Dega në Klinë kinse në mbrojtje të natyrës së bukur të qytetit e kundër ndërtimit të fabrikës, janë patetike, aspak të sinqerta dhe kundërshtuese ndaj vetvetes.

Kjo sepse në përgjigjen e Komunës të vitit 2017 dhënë kompanisë së lartcekur, askund nuk kundërshtohet ushtrimi i kësaj veprimtarie.

Aty thuhet qartë se “Komuna e Klinës lidhur me këtë pronë nuk ka ndonjë interes…”, duke lënë hapësirë të kuptohet pajtimi për fillimin e kësaj veprimtarie.

Madje, ish Kryetari i Komunës në vitin 2016 gjatë një takimi me përfaqësues të një konsorciumi të kompanive shqiptaro-sllovene, kishte shprehur pajtimin në parim që të ndërtohet fabrika e çimentos në Klinë, duke e vlerësuar projektin si mjaftë serioz dhe të dobishëm.

Tash anëtarët e PDK-së kanë vlerësim krejt të ndryshëm, duke trumbetuar me të madhe të kundërtën e asaj që dikur e shihnin si sukses.

Arsyet e qëllimet ata i dinë. Le të mbetet në ndërgjegjen e tyre morale, qytetare e njerëzore.

Dua të theksoj se,
Është i vërtetë fakti që ajo fabrikë mund të sjellë punësim mund të sjellë edhe dobi ekonomike, por të nderuar qytetarë, ta keni të qartë se unë, ZENUN ELEZAJ, Kryetar i Komunës së Klinës, i zgjedhur direkt nga vullneti i popullit, jam në shërbim të juaj dhe do të punoj duke e respektuar gjithmonë vullnetin tuaj.

Andaj personalisht do të angazhohem që kërkesat tuaja të i drejtoj në organet kompetente vendimmarrëse për lëshimin e lejeve për një aktivitet të tillë, që sipas ligjit për Miniera dhe Minerare kompetenca i takon Komisionit të Pavarur për Miniera dhe Minerare dhe Ministrisë së Mjedisit dhe Planifikimit Hapësinor.

Klina nuk është e një Kryetari as e një individi, është e të gjithë qytetarëve.

Jemi ne që qeverisim, por jeni JU ata që vendosni si.