Këngëtarja Rita Ora, u përlot gjatë konferencës për shtyp kur foli për rastin e 11-vjeçares që u dhunua seksualisht nga pesë persona në Kosovë, në fund të gushtit.
Ajo po qëndron në Tiranë, ku të martën në mbrëmje do të mbajë koncert.
“Pak javë më parë, ajo që ndodhi në Kosovë na bëri të kujtojmë se sa e rëndësishme është të kemi në fokus këto çështje sociale dhe sa e rëndësishme është për prindërit dhe komunitetin që të punojnë me të rinjtë që këto ngjarje të mos përsëriten dhe të përmirësohet situata”, u shpreh artistja me famë botërore, përcjell Tch.
Rita ftoi më tej të rinjtë të jenë pjesë e koncertit që ajo do të mbajë në sheshin “Skënderbej” në Tiranë dhe që do të jetë falas për të gjithë.
“Dua të theksoj këtë mesazh për familjen dhe t’i ftoj të gjithë që të bëhet pjesë e koncertit të sotëm në shesh”, ka thënë ajo.
Dhunimi seksual ndaj të 11-vjeçares u bë publik gjatë muajit gusht. Ajo dyshohet se u dhunua nga 5 persona, përfshirë dy të moshës madhore, 19 e 26 vjeç, në një nga parqet e Prishtinës.
Hetimi nxori edhe dyshime të tjera. Ajo dyshohet se është abuzuar seksualisht dhe më pas trafikuar nga gjashtë persona gjatë muajit qershor. Po ashtu, ministri i Punëve të Brendshme të Kosovës, Xhelal Sveçla, tha se “informatat e para janë se ajo është dhunuar për më shumë se një vit”.
Aktualisht janë 11 persona të arrestuar si të dyshuar se e kanë trafikuar dhe kanë abuzuar seksualisht me të vajzën. Kjo ngjarje nxiti protesta në Prishtinë dhe Tiranë.
