Maskat ekzekutojnë me kallashnikov një Besmir Hidën, një 40-vjeçar nga Lushnja baba i dy fëmijëve. Ai është vrarë mëngjesin e sotëm në një bar Kafe në lagjen ‘Skënder Libohova’ ku ka qenë i vetëm duke konsumuar kafenë e mëngjesit. Viktima është gjetur i shtrirë në tokë, në katin e dytë të lokalit, ndërkohë që dëshmitarët kanë parë autorët me maska të largohen me një makinë të vogël.
Besmir Hida është daja i Zamir Latifit i cili mbeti i vrarë dy vite më parë. Nga ngjarja e dy viteve më parë, mbetën të vdekur Zamir Latifi dhe Jurgen Hoxha, ndërsa u plagosën Marius Xhepexhiu, pronar i lokalit ku ndodheshin dy viktimat si dhe një kalimtar. Autorë të kësaj ngjarje ishin Laert Haxhia dhe Orges Bilbili. Atentati kishte lidhje me ngjarjen e datës 25.09.2016 ku është tentuar të vritet me armë zjarri nipi i Aldo Bares, Xhulio Shkurti. Për këtë ngjarje Haxhia ishte në kërkim, pasi ishte dënuar me 24 vite burg në mungesë, ndërsa vrau edhe dy persona të tjerë.
Hida është i njohur si tregtar makinash në qytetin e Lushnjes. Tre vite më parë ai i kishte shpëtuar një atentati me eksploziv. Tritoli ishte vënë në makinën që Hida kishte parkuar jashtë banesës, por nga shpërthimi pati vetëm dëme materiale.
Policia ka ngritur pika kontrolli në hyrje-daljet e qytetit për të bërë të mundur arrestimin e autorëve. Report Tv sjell pamje nga vendi i ngjarjes, pak momente pas vrasjes së Hidës. Policia njofton se për zbardhjen e ngjarjes menjëherë është ngritur grupi hetimor nën drejtimin e Prokurorisë Lushnjë, ndërsa një grup specialistësh nga Departamenti i Policisë Kriminale në Policinë e Shtetit është nisur për t’i ardhur në ndihmë grupit hetimor me qëllim zbardhjen sa më shpejtë të ngjarjes.
