Rusia tërhoqi papritur trupat e saj nga kufiri finlandez

Imazhet satelitore tregojnë se gjatë muajit të kaluar, Rusia ka tërhequr më shumë se 100 njësi të pajisjeve të rënda nga kufiri me Finlandë.

Kjo e fundit, përkoi me fillimin e lëvizjes së Helsinki-t në Aleancën e Atlantikut të Veriut (NATO).

Lajmi u bë i ditur nga transmetuesi finlandez “Yle”.

Largimi i pajisjeve u regjistrua në njësinë ushtarake 34667, e vendosur në fshatin Alakurtti, rajoni Murmansk, 70 kilometra nga kufiri me Finlandën.

Njësia ushtarake i përket Flotës Veriore të Federatës Ruse – rrethi më i ri ushtarak rus.

Brigada e 80-të e veçantë e pushkëve me motor, e cila ka 2 mijë e 100 ushtarakë, shërben në njësinë ushtarake në Alakurt.

Në fillim të majit, media finlandeze raportoi se nuk kishte prova për pjesëmarrje masive të ushtarakëve të brigadës në luftën në Ukrainë.

Por pamjet satelitore të bëra më 13 dhe 24 maj tregojnë se numri i pajisjeve ushtarake në repartin ushtarak është ulur ndjeshëm.

Ata regjistrojnë, në veçanti, heqjen e tankeve dhe traktorëve MT-LB – në total deri në njëqind njësi, si dhe, me sa duket, instalimet e artilerisë vetëlëvizëse “Gvozdyk”.

Sipas përllogaritjeve të ekspertit ushtarak Marko Eklund, nga reparti ushtarak në Alakurt së bashku me pajisjet mund të largoheshin deri në 800 ushtarakë.

Ai supozon se Rusia vendosi t’i transferojë ato në Ukrainë për të marrë pjesë në luftë.

Eklund e konsideron të pamundur versionin që ushtria u tërhoq nga Alakurtti për të kryer stërvitje, pasi ato fillojnë çdo gjashtë muaj dhe duhet të përfundojnë pikërisht në kohën e pranverës.

Kujtojmë se Finlanda së bashku me Suedinë kanë dorëzuar kërkesën për anëtarësim në NATO në maj.

Më 5 korrik, ambasadorët e vendeve anëtare të NATO-s nënshkruan protokollet për anëtarësimin e shteteve në Aleancë.

Sekretari i Përgjithshëm i NATO-s, Jens Stoltenberg pret që procesi i ratifikimit të zgjasë “me muaj”.