Një mosmarrëveshje mes Iranit dhe Koresë Jugore po thellohet, pasi Teherani e kërcënoi Seulin me padi, nëse nuk ia paguan mbi 7 miliardë dollarë për naftën e blerë. Këto fonde janë ngrirë për shkak të sanksioneve amerikane ndaj Republikës Islamike.
Irani ishte partneri tregtar i tretë më i madh i Koresë Jugore në Lindjen e Mesme para se Shtetet e Bashkuara të tërhiqeshin në mënyrë të njëanshme nga marrëveshja bërthamore e vitit 2015 mes Teheranit dhe fuqive botërore dhe para vendosjes së sanksioneve të ashpra.
Republika Islamike ka qenë furnizuese kyçe me karburante e Koresë Jugore dhe në këmbim ka importuar prej saj pajisje industriale e shtëpiake dhe pjesë të automjeteve, shkruan France24.
“Ne kemi 7.8 miliardë dollarë para tona, të bllokuara në bankat e Koresë Jugore. Ky vend e ka marrë naftën, por nuk ka paguar për të”, tha për agjencinë AFP deputeti iranian, Alireza Salimi, i cili është përfshirë në këtë rast.
Ai madje kërkoi nga Koreja Jugore që të paguajë interes për borxhin. “Koreja Jugore nuk është partnere e besueshme tregtare dhe duhet të paguajë interes për të hollat që po i mban në mënyrë jo të duhur”, tha Salimi.
Javën e kaluar, ministri iranian i Punëve të Jashtme, Hossein Amir-Abdollahian, paralajmëroi se vendi i tij do ta padisë Korenë Jugore, nëse ky shtet refuzon ta paguajë borxhin.
Në anën tjetër, një zyrtar i Ministrisë së Jashtme të Koresë Jugore ka refuzuar që ta cilësojë borxh ndaj Iranit shumën e parave, duke iu referuar asaj si fond i ngrirë.
