Serbia në prag të luftës civile, protestuesit thyejnë zyrat e partisë së Vuçiqit

Serbët janë tubuar gjithandej Serbisë të enjten për të protestuar për incidentet e shumta që ndodhën dy ditët e fundit atje. Qytetarët protestues janë sulmuar nga mbështetësit e Partisë Përparimtare Serbe, policët janë përplasur me qytetarët e Policia nuk ka reaguar ndaj sulmeve të mbështetësve ndaj qytetarëve.

Deutsche Welle të enjten ka shkruar në një analizë për situatën në Serbi se regjimi i Aleksandër Vuçiqit po përpiqet t’i shtyjë qytetarët e Serbisë drejt një lufte civile me provokime dhe përdorimin e njësive paraushtarake.

Protestuesit në Novi Sad kanë thyer zyrat e Partisë Përparimtare Serbe, si dhe i kanë ngjyrosur muret e jashtme.

Ministri i Brendshëm serb, Ivica Daçiq, ka thënë se 14 persona janë arrestuar në protesta për sulm ndaj policëve dhe të paktën pesë policë janë lënduar.

Ai ka mohuar se policia ka përdorur forcë ndaj protestuesve, megjithë raportimet se ka pasur.

Një natë më parë, protestat kulmuan kur mbështetës të Partisë Përparimtare Serbe (SNS) i sulmuan protestuesit me mjete piroteknike. Ngjarja shënon përshkallëzim të mëtutjeshëm të protestave që po zgjasin tash e nëntë muaj, të nxitura nga tragjedia në stacionin hekurudhor që la të vdekur 16 persona dhe akuzave për korrupsion, teksa presioni ndaj presidentit serb, Aleksandar Vuçiq, dhe partisë së tij po rritet gjithnjë e më shumë.