Serwer: Grenell dëshiron shkëmbim të territoreve, që Thaçin ta shpëtojë nga Specialja

Përfaqësuesi Special i presidentit Donald Trump për dialogun, Richard Grenell, dje ka takuar gjithë lidershipin në Kosovë. Megjithatë pas takimeve që ka pasur me presidentin Hashim Thaçi dhe liderët tjerë politikë të Kosovës, është lëshuar vetëm një komunikatë nga zyra e Thaçit dhe një reagim në Twitter nga ambasadori i SHBA-së në Prishtinë, Philip Kosnett.

Nga zyra e Thaçit kanë thënë se Grenell shpreson në një rikthim të shpejtë në dialog, ndërsa Kosnett ka thënë se i dërguari i Trump për dialogun mezi pret që t’ia fillojë punës me liderët kosovarë.

Ndërkohë, mediumi amerikan “Bloomberg” i thirrur në burime brenda zyrës së Hashim Thaçit, kanë thënë se Donald Trump i ka dhënë mandat të plotë Grenellit për të arritur një marrëveshje të shpejtë ndërmjet Kosovës dhe Serbisë.

Sipas asaj që shkruan ky medium, emisari i Trump do të bëjë përpjekje që të arrijë një marrëveshje brenda pak muajve. Muajt shkurt-mars të vitit 2020 janë përfolur si ‘deadline’ për arritjen e një marrëveshje finale Prishtinë-Beograd.

Megjithatë lidhur për këtë shkrim të “Bloomberg” ka reaguar ish-diplomati amerikan, Daniel Serwer, i cili që nga fillimi emërimin e Richard Grenell e ka quajtur si një vendim ‘bizar’ të SHBA-së si dhe një ofendim që po i bëhet Gjermanisë.

Serwer thotë që një presion i tillë agresiv ndaj Prishtinës në një kohë kur s’janë krijuar ende institucionet e reja është një shpërdorim diplomatik, por sipas tij i qëllimshëm.

Ish-diplomati amerikan thotë se Richard Grenell dëshiron arritjen e një marrëveshje përmes idesë së shkëmbimit të territoreve, në këmbim të dhënies së imunitetit për presidentin e Kosovës, Hashim Thaçin, karshi Gjykatës Speciale.

Sipas tij, një gjë e tillë i shërben vetëm interesit të Rusisë.

“Një gjë e tillë garanton destabilizimin, iu shërben interesave të Rusisë”, ka shkruar Serwer në një reagim në ‘Twitter’.

Richard Grenell pritet që sot të qëndrojë në Beograd ku do të takojë krerët e shtetit serb. Ndërkohë pas një jave në Serbi për një vizitë do të arrijë edhe Përfaqësuesi tjetër Special për Ballkanin Perëndimor, Matthew Palmer, i emëruar nga Sekretari Amerikan, Mike Pompeo.