SHBA: si u përmbyt “qyteti i mëkatit”

Një stuhi e fortë goditi disa ditë më parë qytetin më të famshëm të “argëtimit absolut” në botë, Las Vegas, duke përmbytur edhe kazinotë e qytetit.

Sipas informacioneve të Wall Street Journal, “qyteti i mëkatit” nuk ka mbetur i paprekur nga kushtet e vështira atmosferike që kanë prekur rajonin më të gjerë.

Hotelet dhe kazinotë përgjatë Bulevardit Jugor të Las Vegas, i njohur si The Strip, u prekën nga shirat dhe përmbytjet pasuese. Në fakt, thuhet se uji rridhte nga tavani në Planet Hollywood Las Vegas Resort & Casino, si dhe Sportsbook në Circa Resort & Casino.

 

Zëdhënësi i Caesars Entertainment Inc. tha se kishte disa rrjedhje në Caesars Palace, por jo përmbytje.

 

Njëkohësisht nga erërat e forta janë shkulur disa pemë, ndërsa rrugët janë kthyer në lumenj, brenda një kohe prej 60-90 minutash.

 

Departamenti i Zjarrfikësve në Las Vegas tha se iu përgjigj më shumë se 300 thirrjeve të enjten mbrëma, sipas një postimi në Twitter. Nga këto thirrje, 22 përfshinin aksidente trafiku dhe shtatë persona u shpëtuan nga ujërat, tha departamenti.

Ironikisht, përmbytjet erdhën vetëm një javë pasi temperaturat ekstreme të të nxehtit goditën Las Vegasin, Nevadën jugore dhe Arizonën veriperëndimore javën e kaluar.

Reshjet e dendura të shiut janë ndalur deri më tani, por shërbimi meteorologjik nuk e përjashton mundësinë e reshjeve të reja në ditët në vijim.