I ftuar në emisionin e mëngjesit “Rreze Dielli” në Report TV, me moderatore Androniki Kolka, ishte Elvis Skuqaj, shkodrani që vendosi të kthehej në Shqipëri për t’u marrë me blegtori pas 26 vitesh emigrim.
”Kam jetuar jashtë vendit tim për 26 vite, në disa shtete si Franca, Gjermania, Amerika dhe më pas vendosa të gjej pak qetësi, duke u kthyer në Shqipëri për dashurinë që kam për këtë tokë, në një kohë kur të gjithë largohen” e nis kështu bisedën në studio i riu, duke shtuar se qetësia dhe paqja që ka gjetur nga ferma e tij e vogël dhe modeste është e pafundme.
”Unë vetë kam pasaportë franceze, aktualisht kam dy djem, një me pasaportë gjermane, një me pasaportë amerikane, prindërit e mi me pasaportë italiane dhe vetëm nusen e kam me pasaportë shqiptare” tha Elvisi në studio, duke na dhënë dhe një lajm të bukur se bashkëshortja e tij pritet që së shpejti të sjellë në jetë trinjakë.
”Të gjithë habiten kur marrin vesh që në familjen time kemi 5 pasaporta të ndryshme dhe kemi vendosur që të kthehemi në Shqipëri, në një kohë kur të gjithë largohen nga ky vend” shtoi Elvisi.
Ai ka hapur një fermë shumë modeste në Shkodër, ku ka shumë keca të cilat prodhojnë qumësht dhe më pas nga ky qumësht, ai prodhon djathin më cilësor me cilësi 100 % bio. Elvisi flet dhe për një problematikë që shqetëson shumë fermerët e veriut, çmimin e lirë të qumëshit, me 70 lek të reja, ndërkohë që në jug ky qumësht shitet me 140 lek, kjo gjë që po e dëmton shumë prodhimin e nënprodukteve të qumështit si djathi apo gjalpi. Ai i bëri dhe një kërkesë për ndihmë institucioneve dhe Kryeministrit që t’a shohin me prioritet këtë gjë, në mënyrë që të zhvillohet sipërmarrja e prodhimit të nënprodukteve të qumështit në Shkodër dhe më gjerë.
