Shtete tjera ndalin kriptovalutat për pasoja financiare, Kosova për energji

Që nga fillimi më 2009, kriptovaluta Bitcoin është përcjellë me polemika në gjithë botën. Në shumë vende investimi në kriptovaluta është konsideruar i rrezikshëm. Ato kanë ndërmarrë masa të caktuara, e ka vende që tashmë e kanë shpallur ilegale. Megjithatë, listës së këtyre shteteve ku kriptovalutat kanë barriera nga shteti i është shtuar Kosova, por vetëm në mihje. Kjo me qëllim për të ruajtur energjinë elektrike.

Ka shumë shtete të fuqishme që nuk e konsiderojnë ilegale marrjen me kriptovaluta, por mundësia e pagesave nuk është e njëjtë në të gjithë botën. Disa shtete kanë caktuar limite se si mund të përdoret Bitcoini, e bankat ua kanë ndaluar transaksionet. Disa shtete kanë caktuar penallti për këdo që bën transaksione.

Tash listës së dhjetëra shteteve që i kanë shfaqur “pengesa” Bitcoinit dhe valutave digjitale i është shtuar pjesërisht edhe Kosova. Shteti ka vendosur të ndalojë mihjen si masë emergjente për energji.

Në një artikull të “Euronews” në nëntor ishin listuar disa shtete që i shohin të paligjshme ose që i kanë ndaluar pjesërisht kriptovalutat. Algjeria, Bolivia, Kina, Kolumbia, Egjipti, Indonezia, Irani, India, Iraku, Nepali, Maqedonia e Veriut, Rusia, Turqia e Vietnami ishin në këtë listë.

Të martën, ministrja e Ekonomisë, Artane Rizvanolli, tregoi se javën e kaluar është vendosur që në nivel vendi të ndalohet prodhimi i kriptovalutave, në një vendim në kuadër të Masave të Emergjencës, për shkak të krizës që ka kapur vendin.

“Institucionet e rendit do të ndalojnë prodhimin e aktivitetit në fjalë me mbështetje të të gjitha institucioneve relevante të cilat do të identifikojnë lokacionet e prodhimit të kriptovalutave. Këto obligime kanë për qëllim trajtimin e çfarëdo mungese të papritur ose afatgjatë të kapacitetit prodhues energjetik, kapacitetit të transmetimit apo të shpërndarjes së energjisë në mënyrë që të tejkalojmë krizën e energjisë pa rënduar më tej qytetarët e Republikës së Kosovës”, ka shkruar ajo në Facebook.

E eksperti i sigurisë kibernetike, Hekuran Doli, ka shpjeguar se si mund të zbatohet një vendim i tillë. Ai ka thënë se kjo mund të bëhet përmes provajderëve që do të mund të ndalonin mihjen përmes sistemit të parandalimit dhe detektimit.

Veriu i Kosovës raportohet të jetë “minierë” e vërtetë për mihje. Kjo për shkak se rryma për këto komuna viteve të fundit është paguar nga shteti.

Vitin e shkuar tregu i kriptovalutave preku shifra rekorde. Për momentin, një Bitcoin, si valuta më e njohur digjitale, ka vlerë gati 47 mijë dollarë.