<p><strong>Spanja dhe Portugalia u goditën të hënën nga një ndërprerje e energjisë elektrike që paralizoi transportin publik, shkaktoi bllokime të mëdha në trafik dhe vonesa në fluturime. Aktualisht, operatorët e shërbimeve publike po përpiqen të rikthejnë funksionimin e rrjetit elektrik.</strong></p>
<p>Autoritetet nuk kanë mundur ta shpjegojnë shkakun e ndërprerjes së energjisë, megjithëse nuk u përjashtua mundësia që ndërprerja ishte shkaktuar nga një sulm kibernetik. Përderisa zyrtarët thanën se hetimet po vazhdojnë, një komitet krize u krijua në Spanjë për ta menaxhuar situatën, sipas burimeve agjencisë Reuters.</p>
<p><amp-youtube data-videoid="QGrFtfUy4rI" layout="responsive" width="1000" height="563"></amp-youtube></p>
<p>Qeveritë e Spanjës dhe Portugalisë thirrën mbledhje të jashtëzakonshme të kabinetit pas ndërprerjes, e cila gjithashtu preku përkohësisht një pjesë të Francës, në kufirin verilindor me Spanjën.</p>
<p>Ndeshjet në turneun e tenisit Madrid Open u pezulluan, duke detyruar tenistin, Grigor Dimitrov, dhe kundërshtarin britanik, Jacob Fearnley, të linin fushën, pasi tabelat e rezultateve u fikën dhe kamerat humbën energjinë.</p>
<p>Radiot spanjolle raportuan se një pjesë e metrosë së Madridit po evakuohej, ndërkohë që kishte bllokime trafiku në qendër të Madridit pasi semaforët kishin dalë jashtë funksionit, raportoi radioja Cadena Ser.</p>
<p>Qindra njerëz qëndronin jashtë ndërtesave të zyrave në rrugët e Madridit dhe kishte një prani të shtuar të policisë rreth ndërtesave kryesore, duke drejtuar trafikun si dhe duke patrulluar nëpër rrugët kryesore, sipas një dëshmitari të Reuters.</p>
<p>Një nga katër kullat në Madrid që strehon Ambasadën Britanike ishte evakuuar, shtoi dëshmitari.</p>
<p>Radiot lokale raportuan për njerëz të bllokuar në vagonët e metrosë dhe në ashensorë të ngecur.</p>
<p>Policia portugeze tha se semaforët ishin prekur në gjithë vendin, metroja ishte mbyllur në Lisbonë dhe Porto, dhe se trenat nuk po funksiononin.</p>
<p>Operatori i metrosë në Lisbonë, Metropolitano de Lisboa, tha se metroja kishte ndaluar plotësisht ndërsa njerëzit ndodheshin ende brenda trenave, sipas gazetës Publico.</p>
<div class="insertion-box">
<div class="mediajsnative"></div>
</div>
<p>Një burim nga kompania ajrore TAP Air në Portugali tha se aeroporti i Lisbonës po funksiononte me gjeneratorë rezervë, ndërsa AENA, që menaxhon 46 aeroporte në Spanjë, raportoi për vonesa të fluturimeve në gjithë vendin.</p>
<p>Në Francë, operatori i rrjetit elektrik RTE tha se kishte pasur një ndërprerje të shkurtër të energjisë, por furnizimi ishte rikthyer.</p>
<p>Operatori portugez i rrjetit elektrik REN konfirmoi një ndërprerje të energjisë në gjithë Gadishullin Iberik që preku gjithashtu një pjesë të Francës, ndërsa operatori spanjoll i rrjetit Red Electrica tha se po punonte me kompanitë rajonale të energjisë për të rikthyer furnizimin me energji.</p>
<p>“Të gjitha planet për rikthimin gradual të furnizimit me energji janë aktivizuar, në koordinim me prodhuesit dhe operatorët energjetikë evropianë”, tha një zëdhënës i REN-it.</p>
<p>“REN është në kontakt të përhershëm me entitetet zyrtare, përkatësisht me Autoritetin Kombëtar të Mbrojtjes Civile. Në të njëjtën kohë, po vlerësohen shkaqet e mundshme të këtij incidenti”, tha ai.</p>


Gjatë një konference për shtyp me Sekretaren e Sigurisë Kombëtare Kristi Noem, senatori i Kalifornisë…
Një top u bë shkaktar për vdekjen e një gruaje 34 vjeçare nga Kosova dhe…
Kryetari i Deçanit, Bashkim Ramosaj, ka ndarë lajmin e dhimbshëm për vdekjen e një nëne…
Një video e re nga një kënd tjetër që tregon aeroplanin e “Air India” duke…
Një burrë britanik që pretendon se ka mbijetuar aksidentin në Ahmedabad ka përshkruar momentin kur…
LDK-ja, e cila refuzoi të bashkëqeverisë me LVV-në, dëshiron Qeveri të Unitetit me përfshirjen e…