Skandal para syve të Kim Jong-un, fundoset ende pa dalë në det luftëanija e Koresë së Veriut

Ceremonia zyrtare e inaugurimit të një luftanije të re të prodhuar nga Koreja e Veriut përfundoi në një katastrofë të vërtetë.

Kjo pasi anija prej 5 mijë tonësh u dëmtua rëndë dhe u fundos para se të nisej për herë të parë dhe gjithçka ndodhi nën sytë e liderit suprem, Kim Jong-un.

Ngjarja, që ndodhi të mërkurën, u transmetua nga agjencia shtetërore e lajmeve KCNA, e cila raportoi se aksidenti ndodhi për shkak të një gabimi serioz operacional dhe neglizhencës në komandim.

Sipas raportit, një defekt në trupin e anijes solli prishjen e ekuilibrit dhe fundosjen e saj, duke rezultuar në një skandal të paprecedentë për flotën ushtarake të vendit.

“Për shkak të komandës së papjekur dhe neglizhencës operacionale, lëvizja paralele nuk mund të garantohej, duke rezultuar në shkëputjen e një pjese dhe më pas fundosjen e anijes”, thuhet në deklaratën zyrtare të KCNA.

“Ekuilibri u prish për shkak të një çarjeje në trupin e anijes në disa seksione”, nënvizohej më tej.

Kim Jong-un reagoi ashpër ndaj incidentit, duke e cilësuar atë si një “akt kriminal të shkaktuar nga pakujdesia absolute, që nuk mund të tolerohet.”

Ai urdhëroi që anija të riparohet dhe të rikthehet në funksion para mbajtjes së takimit të ardhshëm të partisë, i planifikuar për në muajin qershor.

Incidenti vë në pikëpyetje profesionalizmin e strukturave teknike dhe ushtarake të Koresë së Veriut, ndërsa përbën një goditje të rëndë për imazhin e regjimit në një moment kur vendi komunist synon të demonstrojë fuqinë e tij detare.