Sasho Josimovksi, mjeku që u raportua se i vuri stenda pa nevojë pacientit kosovar, Shaqir Shala, ishte i dënuar me burg në Maqedoni.
Josimovski është kardiologu i cili ka dhënë aprovimin për vendosjen e një elektrostimulues permanent të zemrës dhe dy stendave koronare tek Shaqir Shala nga fshati Loxhë i Pejës.
Kardiologu i Spitalit amerikan në Kosovë, maqedonas Sasho Josimovski, i cili dyshohet se i vendosi pacientit kosovar një bateri dhe dy stenta pa nevojë, ka qenë i dënuar dhe i burgosur në Maqedoni për keqpërdorim të detyrës zyrtare.
Gazeta Sinali merr vesh se më 22 tetor të vitit 2012, Sasho Josimovski ishte i dënuar me dy vjet e gjysmë burg nga Gjykata Themelore në Maqedoni, në rastin e njohur “Metastaza”, ku ishin të akuzuar për ndërmarrje të përbashkët kriminale 38 persona, përfshirë mjekë, zyrtarë të pensioneve dhe aftësisë së kufizuar dhe ndërmjetës.
Ndonëse me të kaluar kriminale, ky kardiolog ka ushtruar profesionin e tij prej vitesh në Spitalin Amerikan në Kosovë, duke trajtuar pacientët kosovarë që kishin kërkuar shërim në këtë institucion privat shëndetësor.
Si kishte ndodhur rasti?
Procesi gjyqësor kishte nisur në fillim të vitit 2010 dhe kishte zgjatur rreth dy vjet e gjysmë deri në tetor të vitit 2012 kur ishte shpallur aktgjykimi dënues.
Mjeku nga Klinika e Kardiologjisë, Sasho Josimovski, në atë kohë 37 vjeçar, kishte qenë Kryetari i Komisionit për revizion dhe konfirmimin e invaliditetit pranë Ministrisë së Punës dhe Politikës Sociale.
Sipas aktakuzës, ai së bashku me mjekët tjerë dhe zyrtarët e Fondit të Pensionit dhe Sigurimit të Aftësisë së Kufizuar, akuzoheshin për ndërmarrje të përbashkët kriminale dhe keqpërdorim të detyrës zyrtare.
Ata kishin lëshuar diagnoza të rrejshme ndaj pacientëve për tu siguruar atyre të drejtën e përdorimit të pensionit (invalidor) të aftësisë së kufizuar si dhe kishin rekrutuar ndërmjetësues për të marr ryshfete me qëllim të përfitimit të parave të majme.
Në aktakuzën e 264 faqeve, në mes tjerash, përfshihen edhe deklaratat e katërdhjetë dëshmitarëve të cilët e shpjegojnë mënyrën në të cilën të akuzuarit kishin kërkuar prej 1,500 deri në 4, 000 euro për të lëshuar pensione invalidore.
Grupi kriminal, i cili ishte formuar nga mjeku Sasho Josimovski në vitin 2008, dyshohet se për dy vjet të funksionimit kishte përfituar 165,000 euro dhe duke dëmtuar Fondin prej rreth 250,000 euro.
Nga deklarata e dëshmitarit të rrezikuar gjykata kishte konstatuar se ai e dinte tabelën organizative të dokumentacionit, që aplikantët paguanin nga 3,000 deri në 3.500 euro qofshin të sëmurë apo të shëndetshëm. 1.200 euro shkonte në komision ndërsa pjesën tjetër e ndanin ndërmjetësit dhe mjekët që shkruanin diagnoza. Disa nga dëshmitarët nuk kishin qenë asnjëherë te mjeku dhe as nuk kishin dalë në komision, megjithatë kishin marrë pension invaliditeti.
Sasho Josimovski gjatë procesit gjyqësor 22 tetor 2012
Angazhimi i mjekut me të kaluar kriminale, Sasho Josimovski në Kosovë
Përkundër kësaj të kaluare kriminale dhe dënimit me burg, kardiologu Sasho Josimovski, prej vitesh punon në Spitalin Amerikan në Kosovë dyshohet se ka dhënë aprovimin për vendosjen e një elektrostimuluesi permanent të zemrës dhe dy stentave koronare te pacienti kosovar me inicialet Sh.Sh.
Pas dy ditësh, raportohet se pacienti ka shkuar në QKUK dhe ka kërkuar një mendim profesional rreth këtij problemi. Pas kontrollit të dosjes, është konstatuar se stentat dhe eketrostimuluesi dyshohet që janë vendosur pa nevojë.
Rreth këtij rasti ka reaguar Tefik Bekteshi, drejtori i Klinikës së Kardiokirurgjisë me Kardiologji Invazive i cili ka nisur një shkresë për Prokurorinë, Odën e Mjekëve të Kosovës dhe Inspektoratin e Shëndetësisë, përmes së cilës ka denoncuar shkeljet e supozuara të etikës dhe profesionit.
Në anën tjetër, Josimovski, emri i të cilit u përmend nga ana e ShSKUK-së, ka theksuar se arteria e pacientit kishte bllokadë totale dhe se intervenimet ishin të nevojshme.
“Pacienti është pranuar me diagnozën infarkt akut në murin e parë të zemrës. Arteria ka qenë e mbyllur dhe doktori i parë e ka hapur dhe ka vendosur stentë e pastaj ‘pacemaker’ të përkohshëm. Ka qenë bllok total dhe unë nuk e kuptoj se si kanë mundur ta komentojnë kolegët tanë kardiologë sepse këtë e kuptojnë edhe studentët e mjekësisë. Ka qenë bllok total dhe prandaj kemi vendos ‘pacemaker’ të përhershëm dhe për këtë s’kemi dilema”, ka thënë Josimovski për express.
Ai shtoi se pacienti në fjalë gjendjen e ka stabile dhe se vazhdimisht që nga muaji korrik, kontrollet dhe terapitë i ka kryer vazhdimisht në konsultim me të.
Kardiologu deklaron se ‘pacemaker’ i përkohshëm është vendosur për shkak se procedura në arterie koronare kryhet më lehtë dhe pastaj duhet të pritet nëse hiqet blloku total ose jo. Pastaj është vendosur ‘pacemaker’ i përhershëm.
“Bllok total është diagnoza. Zotëria ka probleme me arterien e majtë. Pacienti me bllok total i verifikuar me EKG, ka qenë persistent, prandaj është dashur të vendoset ‘pacemaker’. Këtë e dinë edhe studentët e mjekësisë”.
“Ka qenë 100 përqind e mbyllur arteria. Kjo mund të vërtetohet me koronarografinë që e kemi bërë. Ne në këtë spital ua japim CD-në pacientëve, në spitalet tjera nuk ua japin”, ka thënë ai.
Josimovski shprehet se nuk është mirë që doktorët deklarojnë kundër njëri-tjetrit. “Doktorët kundër doktorëve, kjo nuk është mirë. Unë i njoh krejt doktorët atje dhe nuk është mirë me folë”, ka deklaruar Josimovski.
