Spektakël me 7 gola, Barcelona përmbys Realin dhe “vret” kampionatin

Barcelona është shumë pranë fitimit të titullit kampion, pasi fitoi 4-3 kundër Real Madridit dhe u shkëput 7 pikë larg në krye të renditjes së La Liga-s, kur kanë mbetur edhe 3 javë nga fundi.

Pas fitores edhe në finalet e Superkupës së Spanjës dhe Kupës së Mbretit kundër të njëjtit kundërshtar, katalanasit janë tani vetëm një fitore larg nga kompleti i trofeve vendës.

Ndeshja nisi me intensitet të lartë nga ana e Real Madridit, të cilët gjetën avantazhin pas vetëm pesë minutash me një penallti të shndërruar në gol nga Kylian Mbappé, pas një gabimi të mbrojtësit Pau Cubarsí dhe faullit të portierit Szczęsny. Mbappé shtoi shpejt edhe një gol të dytë, duke përfituar nga një pasim i Vinícius Júnior.

Spektakël me 7 gola, Barcelona përmbys Realin dhe “vret”

Barcelona reagoi me forcë. Eric García ngushtoi diferencën me një goditje me kokë, ndërsa Lamine Yamal shënoi një gol të mrekullueshëm me një goditje të parë precize. Raphinha përfitoi nga gabimet e mbrojtjes madrilene dhe realizoi dy herë, duke kompletuar përmbysjen brenda 15 minutave.

Mbappé e kompletoi het-trikun në pjesën e dytë, por Barcelona vazhdoi të krijonte raste. Pavarësisht një goli të anuluar dhe një tjetër të ndalur për prekje të topit me dorë, katalanasit ruajtën avantazhin dhe siguruan një fitore të madhe.

Me këtë sukses, Barcelona e çon avantazhin në krye të tabelës në shtatë pikë me vetëm tre ndeshje të mbetura, duke u afruar ndjeshëm me titullin e LaLiga-s dhe duke i dhënë fund serisë prej katër fitoresh radhazi të Real Madridit në kampionat.