“S’po na lejnë miqtë e shkijeve”, TKZ njoftojnë se nuk do të jenë në stadium ndaj Serbisë

Kombëtarja shqiptare e futbollit do të luajë të shtunën në “Arenën Kombëtare” përballë Serbisë, pa “Tifozat Kuq e Zi” në krah të tyre.

Grupimi më i madh i tifozëve të kombëtares ka njoftuar përmes rrjeteve sociale se nuk do të jenë në tribuna për sfidën Shqipëri–Serbi më 7 qershor, duke deklaruar se kjo është hera e dytë në 21 vite që diçka e tillë ndodhë, dhe në të dyja rastet po përballë “shkijeve”.

Në një reagim të fortë në rrjetet sociale, TKZ e krahasojnë këtë situatë me ndeshjen e vitit 2014 në Beograd, kur u ndaluan nga autoritetet serbe. Këtë herë, sipas tyre, janë “miqtë e shkijeve”, pra FSHF-ja, që po i përjashton.

TKZ pretendon se nuk kanë marrë pjesë në “farsën e organizuar nga FSHF me pretekstin e një shorti” për shpërndarjen e biletave të kësaj sfide, short të cilin e konsiderojnë një skemë të parapërgatitur për të favorizuar agjencitë turistike dhe shitjen e biletave në treg të zi me çmime të papërballueshme.

Sipas tyre, sistemi i ri i shitjes së biletave është i ndërtuar për të përjashtuar tifozët besnikë dhe për të mbushur tribunat me klientelë, politikanë e të pasur.

“Futbolli është kthyer në një event për të pasurit. Biletat arrijnë deri në 1000 euro, dhe për një familje shqiptare është e paimagjinueshme të shpenzojë 600 euro vetëm për të parë një ndeshje”, thuhet në deklaratë.

Ata akuzojnë FSHF-në për hipokrizi, pasi pretendimi për gjithëpërfshirje sipas TKZ në të vërtetë është përjashtim i atyre që kanë ndjekur Kombëtaren për dekada të tëra.

REAGIMI

TIFOZAT KUQ E ZI NUK DO TË JENË NË STADIUM!

Për herë të parë që nga themelimi, tash e 21 vite, nuk do të jemi në stadium për të përkrahur Kombëtaren tonë. Në fakt, kjo është hera e dytë. Herën e parë më 14.10.2014, nuk na lanë shkijet. Tash më 07.06.2025, nuk po na lejojnë miqtë e shkijeve (FSHF), dhe atë në shtëpinë tonë.

Ndryshe nga ndeshjet e mëparshme ku anëtarët tanë u organizuan për të siguruar bileta në sektorin tonë tradicional, këtë herë nuk morëm pjesë në farsën e organizuar me pretekstin e një “shorti” të rremë. Ky sistem, i ndërtuar për të garantuar bileta për agjencitë turistike dhe më pas për të ushqyer pazaret e zakonshme, është thellësisht i padrejtë dhe i papranueshëm.

Absurdi i kësaj ndeshjeje qëndron te hipokrizia e vazhdueshme e FSHF-së, e cila predikon gjithpërfshirje, por në realitet përjashton tifozët e vërtetë, ata që e kanë ndjekur Kombëtaren për më shumë se 21 vite. Futbolli është kthyer nga një aktivitet popullor në një event ekskluziv për të pasurit, ku çmimet e biletave variojnë nga 150 deri në 1000 euro.

Është e paimagjinueshme që një familje shqiptare mesatare, një prind me bashkëshorten dhe dy fëmijë, të duhet të paguajë rreth 600 euro për të ndjekur një ndeshje, aq sa kushton një javë pushime në qershor. Kjo është politika përjashtuese e Federatës Shqiptare të Futbollit: nëse nuk je i pasur, nuk ke vend në stadium.

Por jo të gjithë jemi milionerë si Presidenti i FSHF-së dhe rrethi i tij. Gjithpërfshirja i ka të gjithë brenda përveç se TKZ-në. Aty janë agjencitë e udhëtimit dhe politikanët, por vetëm BESNIKËT e përjetshëm JO. Diçka e tillë nuk është parë kurrë. Le të fitojë njëherë Kombëtarja.