Sulm me dron në Rusi, goditet rafineria e naftës – 1,800 km larg kufirit ukrainas

Një sulm me dron shënjestroi një strukturë industriale në qytetin siberian të Tyumenit të hënën në mbrëmje, thanë autoritetet lokale, duke e cilësuar si sulmin e parë të tillë në qytet, më shumë se 1,800 km nga Ukraina.

Në një deklaratë në aplikacionin Telegram, autoritetet rajonale ruse thanë se tre dronë u “zbuluan dhe neutralizuan” brenda një kompleksi kompanie në lagjen Antipino në anën lindore të Tyumenit.

Autoritetet nuk specifikuan origjinën e dronëve dhe Ukraina ende nuk e ka marrë përgjegjësinë për sulmin. Sipas mediave lokale, një rafineri e madhe nafte ishte në shënjestër.

Autoritetet rajonale thanë se shërbimet e shpëtimit nxituan në vendngjarje për të parandaluar “shpërthimin” e droneve, por media lokale MegaTioumen, duke cituar një dëshmitar okular, raportoi se një strukturë ftohëse u godit në rafineri.

Rajoni i Tyumenit, i pasur me hidrokarbure, ndodhet më shumë se 1,800 km në vijë të drejtë nga kufiri ukrainas. Ky është sulmi i parë me dron i raportuar në këtë territor që nga fillimi i ofensivës në shkallë të gjerë të Rusisë kundër Ukrainës në shkurt 2022.

Në muajt e fundit, në përgjigje të bombardimeve masive ruse të territorit të saj, Ukraina ka kryer sulme të shumta në rafineritë e naftës në Rusi, gjë që ka çuar në një rritje të çmimit të benzinës.

Në qershor, ushtria ukrainase kishte goditur gjithashtu bazat ajrore ruse larg frontit, në Siberi dhe Arktik, me dronë që hynë fshehurazi në Rusi.