Sulmet izraelite në Siri shkatërruan një depo me mbi 1000 raketa të prodhuara nga Irani

Sulmi ajror në qytetin sirian Masyaf që i atribuohej Izraelit goditi një depo që përmbante mbi 1 mijë raketa të prodhuara nga Irani.

Kështu njoftoi Observatori Sirian për të Drejtat e Njeriut.

Magazina, e vendosur brenda kompleksit të Qendrës së Studimeve Shkencore dhe Kërkimeve Siriane (SSRC) në qytet, ruante mijëra raketa me rreze të mesme, të mbledhura nën mbikëqyrjen e “oficerëve ekspertë të IRGC”.

Sistemet siriane të mbrojtjes ajrore u aktivizuan në Sirinë veriperëndimore të enjten pasdite, me agjencinë shtetërore siriane të lajmeve “SANA” që deklaroi se forcat lokale po “përballeshin me objektiva armiqësore” mbi Masyaf.

Më vonë, agjencia raportoi se sulmi ajror i supozuar ishte një sulm izraelit.

Për më tepër, zjarre të shumta shpërthyen në zonat përreth për shkak të copëzave nga shpërthimet e magazinës që thuhet se ishin në shënjestër nga forcat izraelit.

Sipas raporteve siriane, shpërthimet dytësore vazhduan për orë të tëra pas sulmeve.

Banorët vendas thuhet se janë udhëzuar të strehohen diku tjetër derisa zjarret të vihen nën kontroll.

SSRC-ja ka qenë në shënjestër të sulmeve ajrore të supozuara izraelite disa herë në të kaluarën, duke përfshirë një sulm të rrallë gjatë ditës më 9 prill.