Dmitry Peskov deklaroi të premten e 1 prillit se “sulmi ukrainas” kundër një depoje karburanti në qytetin rus të Belgorod-it nuk krijoi kushte komode për të vazhduar bisedimet e paqes me Kiev-in.
Autoritetet ruse akuzuan Ukrainën se kishte sulmuar depon, por autoritetet ukrainase nuk iu përgjigjën menjëherë kërkesave për koment.
Njoftimi i zyrtarit rus erdhi gjatë një bashkëbisedimi me gazetarët në një konferencë telefonike.
Peskov theksoi se autoritetet po bënin gjithçka për të riorganizuar zinxhirin e furnizimit me karburant dhe për të shmangur ndërprerjen e furnizimit me energji në Belgorod.
Shtabi i Përgjithshëm i Ukrainës nuk e konfirmoi “përgjegjësinë” për sulmin në Belgorod.
Njoftimi u bë i ditur nga dy gazetarët e së përditshmes gjermane “Bild”, Julian Ropcke dhe Filipp Piatov.
“Shtabi i Përgjithshëm i Ukrainës i thotë kolegut tim Piatov, se ‘nuk e ka këtë informacion’ që forcat ukrainase sulmuan një depo nafte në rajonin e Belgorod-it, duke lënë të kuptohet se sulmi mund të jetë një flamur i rremë rus për të justifikuar sulme të mëtejshme brutale në vend”, shkruan Ropcke në Twitter.
Dy nga helikopterët ushtarakë të Ukrainës goditën një depo karburanti në qytetin rus të Belgorod-it të premten e 1 prillit.
Ky ishte lajmi i agjencisë “Reuters” që citonte guvernatorin rajonal Vyacheslav Gladkov.
