Këshilli Gjyqësor i Kosovës në mbledhjen e sotme ka zgjedhur kryesuesin e saj. Pas procesit të votimit unanim të anëtarëve të KGjK-së, Albert Zogaj është zgjedhur në pozitën e Kryesuesit të Këshillit Gjyqësor të Kosovës, me një mandat tre vjeçar.
Zogaj është emëruar edhe në krye të Komisionit për Provimin e Jurispodencës, derisa KOHA muaj më parë ka raportuar që ai ushtron disa funksione, praktikë kjo e cila është në kundërshtim me Ligjin për Parandalimin e Konfliktit të Interesit.
Albert Zogaj është gjyqtar në Gjykatën Supreme, dega civile. Ai ka diplomuar në Fakultetin Juridik në Universitetin e Prishtinës, ndërsa studimet post-diplomike në drejtimin Juridiko-Civil i ka përfunduar në vitin 2008.
Nga dhjetori 2004 deri në dhjetor 2005, ka punuar si avokat-praktikant në Odën e Avokatëve të Kosovës.
Në shkurt të viti 2006, përfundoi provimin e jurisprudencës ndërsa nga shkurti i vitit 2006 e deri në tetor të vitit 2010, punoi si avokat në Pejë. Në tetor të vitit 2010 është emëruar gjyqtar në Gjykatën Komunale në Prishtinë, ku ka punuar deri në dhjetor të vitit 2012.
Nga viti 2013 deri më 2015 punoi si gjyqtar në Gjykatën Themelore në Prishtinë në Departamentin e Përgjithshëm. Në gusht të vitit 2015 është emëruar gjyqtar në Gjykatën e Apelit, në Prishtinë, në Departamentin e Përgjithshëm – Divizioni Civil.
Në shtator 2020 është zgjedhur gjyqtar në Gjykatë Supreme. Prej vitit 2008 punon si ligjërues në Kolegjin AAB, njëkohësisht është edhe trajnues në Akademinë e Drejtësisë, në programin fillestarë dhe të vazhdueshëm të arsimimit ligjor.
Ka punuar dhe ka marrë pjesë në disa hulumtim-punime profesionale me institucione të ndryshme si Qendra Juridike e Kosovës, Qendra për të Drejtat e Njeriut e Universitetit të Prishtinës, Institutit Gjyqësor të Kosovës, etj.
