Ministri i Brendshëm, Xhelal Sveçla, ka thënë se institucionet e Kosovës i kanë të gjitha kapacitetet që t’i largojnë barrikadat në veri.
Sveçla ka shkruar në Facebook se bashkë me partnerët ndërkombëtar, janë duke e vlerësuar situatën për reagim adekuat.
“Një nga lokalet e Prishtinës, si shumë biznese e familje bujare, dje ka përgatitur ushqim për zyrtarët tanë policor që po angazhohen në veri, në mbrojtje të vendit tonë. Darkën e kaluam së bashku me zyrtarët policor në Bërnjak të cilët, si gjithë të tjerët, me moral të lartë e me përkushtim po punojnë sipas misionit të tyre në ofrimin e sigurisë e në mbrojtjen e sovranitetit e integritetit territorial të vendit tonë. Ndërsa, nga qytetarët e kësaj zone që janë bllokuar nga barrikadat tash e një javë po kërkohet me ngulm heqja e barrikadave dhe vazhdimi i jetesës dhe zhvillimit pa pengesa. Çdo çast i kaluar nën bllokim të barrikadave të ngritura nga grupe të armatosura e kriminale është i tepërt. Institucionet e Republikës së Kosovës i kanë të gjitha kapacitetet për ti larguar barrikadat dhe në koordinim me partnerët tanë ndërkombëtar janë duke vlerësuar situatën për reagim adekuat”, ka shkruar Sveçla.
Sipas tij, veriu duhet të kthehet sa më shpejt në normalitet.
Barrikadat e serbëve në veri kanë hyrë të shtunën në ditën e tetë.
