Presidenti i Serbisë, Aleksandër Vuçiç, në një konferencë për media u tha serbëve se ishte e pavërtetë që polici Ekrem Neziri është qëlluar me plumba, porse ai është “lënduar nga xhamat në sulmet ndaj zyrave të KKZ-së në Mitrovicën e Veriut”.
Për ta përgënjështruar, ministri i Punëve të Brendshme të Kosovës, Xhelal Sveçla, ka publikuar fotot që dëshmojnë plagët nga plumbat të policit Ekrem Neziri.
“Sulmet ndaj zyrave të KKZ-së kanë ndodhur me datë 6 dhjetor ndërsa sulmi me armë zjarri ndaj zyrtarit policor Ekrem Neziri ka ndodhur me datë 8 dhjetor në fshatin Serbovc, mes Zveçanit dhe Leposaviqit”, shpjegoi Sveçla.
Për Sveçlën, “këto të pavërteta dhe shumë të tjera janë përpjekje të dështuara të Vuçiç, që kanë për qëllim të kamuflojnë sulmet e grupeve të tij kriminale”.
“Policia e Kosovës asnjëherë të vetme nuk ka terrorizuar apo sulmuar asnjë qytetar, aq më pak për shkak të përkatësisë etnike. E vërteta është se grupet kriminale të dirigjuara nga Vuçiq kanë shtënë për t’i eliminuar zyrtarët tanë policorë si dhe kanë sulmuar brutalisht e terrorizuar qytetarët tanë”, thotë ministri.
Por, është i bindur se “propaganda e tij më nuk gjen adresë, askund”, duke shtuar se “ne do të vazhdojmë dhe do të qëndrojmë, për të gjithë qytetarët pa dallim e për shkatërrimin e të gjitha grupeve kriminale që dirigjon propaganduesi Vuçiç dhe jo vetëm”.
