Tensionet në Lindjen e Mesme, SHBA evakuon ambasadat në Iran e Irak

Shtetet e Bashkuara kanë urdhëruar evakuimin e stafit jo-thelbësor dhe familjarëve të tyre nga ambasada amerikane në Bagdad, për shkak të rritjes së rrezikut të sigurisë në rajon. Vendimi vjen në një kohë kur tensionet mes SHBA-së, Iranit dhe Izraelit janë përshkallëzuar ndjeshëm.

Zyrtarë amerikanë, të cituar nga CBS dhe BBC, thanë se Izraeli i ka njoftuar SHBA-të për gatishmërinë për të ndërmarrë një operacion ushtarak kundër Iranit. Kjo ka ngritur shqetësime se Irani mund të hakmerret duke goditur objektiva amerikane në Irak dhe rajone të tjera të Lindjes së Mesme.

Ndërkohë, bisedimet mes SHBA-së dhe Iranit për programin bërthamor iranian kanë ngecur. Përfaqësuesi amerikan për Lindjen e Mesme, Steve Witkoff, pritet të zhvillojë takimin e gjashtë me ministrin e Jashtëm iranian, Abbas Araghchi, të dielën në Muskat.

Presidenti Trump, gjatë një daljeje publike në Kennedy Center, tha se amerikanët janë këshilluar të largohen nga rajoni sepse “mund të bëhet një vend i rrezikshëm.” Ai shtoi se SHBA nuk do të lejojë Iranin të zhvillojë armë bërthamore.

Ministri i Mbrojtjes së Iranit, Aziz Nasirzadeh, paralajmëroi se Irani do të hakmerrej ndaj bazave amerikane në rajon nëse negociatat dështojnë dhe SHBA ndërmerr veprime ushtarake.

Ndërkohë, Sekretari amerikan i Mbrojtjes ka miratuar largimin vullnetar të familjarëve të personelit ushtarak nga disa vende të Lindjes së Mesme, përfshirë Kuvajtin dhe Bahreinin.

Pas lajmit për evakuimin, çmimi i naftës u rrit me mbi 4%, mes frikës për destabilizim të mëtejshëm në rajon.

Aktualisht, në Irak ndodhen rreth 2,500 trupa amerikane.