Shpenzimet e mbrojtjes në Mbretërinë e Bashkuar do të rriten në 2.5% të Bruto Produktit Vendor deri në vitin 2027, teksa buxheti i ndihmës jashtë vendit do të zvogëlohet, ka thënë Sir Keir Starmer, kryeministër britanik, përpara një takimi me Donald Trump.
Rritja nga 2.3% aktuale do të thotë se 16.6 miliardë dollarë më shumë do të shpenzohen çdo vit për mbrojtjen pas atij viti, njoftoi kryeministri në një deklaratë të papritur në Dhomën e Ulët të parlamentit britanik, sipas Sky News, përcjell Insajderi.
Numri është shumë më i ulët nga ajo sa ka kërkuar presidenti i SHBA-së, Donald Trump. Ai ka kërkuar që anëtarët e NATO-s të shpenzojnë për mbrojtje pesë për qind.
Sir Keir njoftoi gjithashtu se qeveria do të shkurtonte ndihmën e huaj për të financuar rritjen, duke ulur shpenzimet aktuale nga 0.5% e BPV-së në 0.3%.
Momente përpara njoftimit, Ministria e Jashtme tha se po ndalonte disa ndihma për Ruandën për shkak të rolit të saj në konfliktin në Kongon fqinje.
Ai përsëriti angazhimin e qeverisë britanike ndaj NATO-s, të cilën ai e përshkroi si “shtrati i sigurisë” së Britanisë së Madhe dhe kritikoi presidentin rus Vladimir Putin, duke thënë se “tiranët marrin vesh veç përmes forcës”.
Duke iu drejtuar vizitës së tij të ardhshme në Shtëpinë e Bardhë për të takuar Trumpin, kryeministri britanik tha se dëshiron që marrëdhënia e Mbretërisë së Bashkuar me SHBA-në të shkojë nga “forca në fuqi”.
