Trump mesazh Iranit: Sulmet tjera do të jenë më brutale, bëj marrëveshje para se të jetë vonë

Presidenti i Shteteve të Bashkuara të Amerikës, Donald Trump ka paralajmëruar Iranin se do të përballet me “bombardime shkatërruese” nëse nuk pranon marrëveshjen për armët bërthamore.

Përmes një postimi në rrjete sociale, shefi i Shtëpisë së Bardhë ka thënë se i ka dhënë Iranit shumë shanse për marrëveshje, por ata nuk arritën ta bëjnë.

“I dhashë Iranit mundësi pas mundësie për të bërë një marrëveshje. U thashë me fjalët më të forta: ‘Thjesht bëjeni’. Por, sado që u përpoqën, sado afër që arritën, nuk mundën ta bënin”, shkruan Trump.

Ai theksoi se i kishte paralajmëruar se do të bëhej me keq.

“I paralajmërova se do të ishte shumë më keq sesa ç’kishin menduar, pritur apo u ishte thënë. Shtetet e Bashkuara prodhojnë pajisjet ushtarake më të mira dhe më vdekjeprurëse në botë — pa asnjë konkurrencë – dhe Izraeli ka shumë prej tyre, me edhe më shumë që po vijnë. Dhe ata dinë si t’i përdorin,” ka thënë Trump.
Trump po ashtu pohoi se sulmet e radhës janë planifikuar të jenë edhe më brutale, duke shtuar se ende ka kohë për të ndaluar “këtë masakër”.

“Disa iranianë të vijës së ashpër folën me guxim, por nuk e dinin çfarë po i priste. Tani janë të gjithë të vdekur — dhe situata do të përkeqësohet më tej. Ka pasur tashmë shumë vdekje dhe shkatërrim, por ende ka kohë për ta ndalur këtë masakër. Sulmet e radhës janë planifikuar të jenë edhe më brutale.”

“Irani duhet të arrijë një marrëveshje — përpara se të mos mbetet asgjë. Të shpëtojë atë që dikur njihej si Perandoria Iraniane. Mjaft më me vdekje, mjaft më me shkatërrim. Thjesht bëjeni — përpara se të jetë vonë,”, apeloi Trump.

Ushtria izraelite tha se rreth 200 avionë luftarakë morën pjesë në sulmet masive, dhe televizioni izraelit raportoi se agjencia e inteligjencës, Mossad, mund të ketë ngritur një bazë sekrete brenda Iranit si pjesë e këtij operacioni.

Lideri suprem i Iranit, Ayatollah Ali Khamenei, paralajmëroi se Izraeli do të përballet me pasoja të rënda për shkak të këtyre sulmeve.

“Me këtë krim, regjimi sionist i ka përgatitur vetes një fat të hidhur dhe të dhimbshëm dhe do ta marrë atë pa dyshim”, tha Khamenei në një deklaratë