Bratislav Zhivkoviq, një mercenar serb i shpallur person non grata në Rumani në vitin 2017 për spiunazh në favor të Rusisë, është vrarë gjatë betejave në rajonin e Kurskut të Rusisë.
Kanalet pro-ruse në Telegram konfirmuan vdekjen e Zhivkoviqit, duke pretenduar se ai vdiq “në beteja të ashpra për çlirimin e rajonit të Kurskut”.
Qeveria serbe ende nuk ka komentuar mbi raportet. Zhivkoviq kishte luftuar për Rusinë kundër Ukrainës që nga viti 2014, si udhëheqës i një organizate paraushtarake nacionaliste serbe, çetnikët.
Në vitin 2017, ai u dëbua nga Rumania me urdhër të gjykatës për spiunazh pasi bëri fotografi të radarëve ushtarakë në bregun e Detit të Zi, dhe siguroi koordinatat e tyre GPS për kontaktet ruse.
Një vit më vonë, ai u burgos në Serbi për shkak të pjesëmarrjes në operacione ushtarake për një shtet të huaj, por më vonë u lirua.
Ukraina kishte hapur gjithashtu një çështje penale kundër Zhivkoviqit, për rekrutimin e të huajve për të luftuar kundër Ukrainës.
