U vodh në Gjermani, policia e gjen veturën në Malishevë

Policia e Kosovës ka arritur ta identifikojë një veturë të vjedhur në Gjermani në Komunën e Malishevës.

“Rreth orës 19:05, Stacioni Policor në Malishevë ka pranuar një informacion nga Stacioni Policor në Mitrovicën e Veriut lidhur me një automjet transportues, i cili ishte duke bartur një veturë me targa gjermane, për të cilën dyshohet se është vjedhur në territorin e Gjermanisë dhe ishte në drejtim të komunës së Malishevës”, thuhet në njoftim.

“Menjëherë pas pranimit të informatës, njësitë kompetente të policisë janë njoftuar dhe janë angazhuar në terren për të hetuar rastin. Gjatë zhvillimit të hetimeve, është pranuar një informatë shtesë se vetura e dyshuar ishte duke u dërguar në fshatin Senik të Malishevës. Në këtë lokacion, njësitë policore kanë arritur të ndalojnë automjetin transportues së bashku me veturën e ngarkuar. Të dy mjetet janë sekuestruar dhe janë dërguar në Stacionin Policor në Malishevë për procedura të mëtejshme hetimore”.

“Lidhur me këtë rast, në këtë fazë të hetimeve, në cilësinë e dëshmitarëve janë intervistuar dy persona. Në konsultim me prokurorin e shtetit është iniciuar rasti “Pranim i mallrave të vjedhura”. Rasti do të trajtohet në procedurë të rregullt”, thuhet ndër të tjera në njoftim.