Ua mori nga 200 euro për t’ua siguruar terminët për viza në ambasadë dhe u zhduk, arrestohet 31-vjeçari në Fushë Kosovë

Rastet e mashtrimit me viza në Kosovë nuk janë të rralla. Shumë herë Sinjali ka raportuar se si kosovarët nga dëshira për të ikur nga vendi, kanë rënë pre e mashtruesve, të cilët u kanë premtuar terminë nëpër ambasada e viza për zonën Schengen.

Për një rast të tillë mbrëmë ka rënë në prangat e Policisë një person, i cili dyshohet se mori para me premtimet se do t’ua sigurojë dy viktimave nga një termin për vizë në ambasadën gjermane.

Burimet e Gazetës Sinjali brenda Prokurorisë kanë bërë me dije se 31-vjeçari dyshohet se përmes rrjetit social Facebook ka rënë në kontakt me viktimat dhe të njëjtëve u ka kërkuar fillimisht nga 200 euro për t’ua siguruar nga një termin në ambasadë.

E me të përfunduar procedura, viktimat do duhej t’ia jepnin të dyshuarit edhe nga 800 euro tjera. Por zhdukja e 31-vjeçarit, i cili posa mori paratë s’u bë më i gjallë dhe s’u lajmërua asnjëherë në telefonatat e viktimave, i detyroi këta të fundit që të kërkojnë ndihmën e Policisë pasi morën vesh se kanë rënë pre e mashtrimit.

Si rezultat i denoncimit, i dyshuari është shoqëruar në stacion policor, ku është intervistuar lidhur me rastin.

Pas përfundimit të procedurave policore, Prokurori i Shtetit ka nxjerrë aktvendim që të dyshuarit t’i caktohet masa e ndalimit policor dhe i njëjti do të hetohet për veprën penale ‘Mashtrim’.