Udhëheqësi i rebelëve në Siri i kërkon një vajze të mbulojë flokët për një foto, veprimi i tij merr reagime të ashpra

Një video që tregon kreun e Hayat Tahrir al-Sham (HTS) në Siri duke i kërkuar një gruaje të mbulojë flokët me shami përpara se të pranojë të fotografohet, ka marrë reagime të ashpra.

Incidenti që përfshin Abu Mohammed al-Jolani, ndodhi më 10 dhjetor gjatë një vizite në lagjen Meza të Damaskut. Në video, al-Jolani shihet duke i kërkuar Lea Keirala për të mbuluar flokët e saj, ndërsa ajo pranon menjëherë.

“Nuk e kam detyruar. Por është e drejta ime personale. Dua që fotot që bëj të më përshtaten”, u përgjigj al-Jolani.

Keirala vajza e cila e zbatoi kërkesën e tij, u shpreh se lideri i rebelëve ka të drejtë të paraqitet në mënyrën që ai e sheh të arsyeshme. Megjithatë, këto imazhe shkaktuan reagime si nga komentuesit liberalë, ashtu edhe nga ata konservatorë.
Liberalët kanë shprehur shqetësimin se lëvizja e al-Jolanit është një tregues i parë se ai do të dëshirojë të zbatojë ligjin islamik në Siri. “A po shkon drejt sundimit islam?” pyeti kanali arab i France 24. “Kemi zëvendësuar një diktator me një diktator reaksionar”, ka shkruar një gazetar sirian.

Nga ana tjetër, islamistët e linjës së ashpër kritikuan al-Jolani për pranimin që të regjistrohej dhe fotografohej me një grua të re, ndërsa disa përdorën termin “mutabarijah” për Keirala, një term nënçmues për gratë që ata konsiderojnë se janë të veshura në mënyrë të pahijshme ose që veshin marka.