Mbrëmjen e së hënës në fshatin Gadime e Ulët në Lipjan është gjetur pa shenja jete Shqipdon Aliu i cili ishte zhdukur para nëntë ditësh. Pas shumë kërkimesh, 24-vjeçari u gjet i vdekur në një gropë, e rrethanat e vdekjes së tij janë ende të panjohura. Express sjell rrëfimin e personit që kishte gjetur gjërat që i përkisnin Shqipdonit e që çuan deri në gjetjen e tij
Të shtunën e 12 tetorit ishte larguar nga shtëpia e tij në fshatin Gadime e Ulët e Lipjanit. 24-vjeçari Shqipdon Aliu kishte thënë se po shkon në Prishtinë për t’u takuar me dikë. Mirëpo, ai nuk kishte shkuar atje ku kishte thënë.
Familjarët e brengosur kishin lajmëruar zhdukjen e Shqipdonit pas dy ditësh, pasi nuk kishin arritur të kontaktonin me të në asnjë mënyrë.
Gjatë kohës kur Shqipdoni po konsiderohej i zhdukur, babai i tij i cili nuk ishte në dijeni për zhdukjen e djalit, vdiq nga sëmundja e rëndë të cilën e kishte.
E në këto rrethana, gjetja e Shqipdonit ishte bërë edhe më e domosdoshme për familjen.
Pas disa ditësh kërkime pa sukses, policia kishte kërkuar edhe ndihmën e qytetarëve për ta gjetur Shqipdonin.
Pas nëntë ditësh, Shqipdoni u gjet i vdekur në fshatin e tij të lindjes. Lajmin për gjetjen e tij e konfirmoi policia në mbrëmjen e së hënës.
“Me datën 21.10.2019 rreth orës 21:30, në fshatin Gadime e Ulët tè Lipjanit, saktësisht në një gropë (te gurthyesi i vjetër), është gjetur një trup i pajetë. Ekipet e nevojshme policore janë ne vendngjarje. Bazuar në të dhënat fillestare dyshohet se bëhet fjalë për personin e raportuar të zhdukur me datën 14 tetor. Kanë qenë informacionet e qytetarëve ato që kanë ndihmuar policinë të gjejnë vendndodhjen e personit”, tha për Express Zëdhënësi i Policisë së Kosovës, Daut Hoxha.
Ahmet Limani ishte personi që kishte rënë në gjurmë të Shqipdonit mbrëmjen e së hënës. Ai kishte gjetur telefonin e tij, një pako cigaresh dhe një shkrepës, në vendin ku më pas do të gjendej edhe trupi i pajetë i 24-vjeçarit.
Limani ka treguar për Express se si ka ndodhur e tërë ngjarja pas gjetjes së gjërave të cilat i përkisnin Shqipdonit.
“E kam gjetë një telefon, një pako cigaresh dhe një shkrepës. Telefoni ka qenë i ndalur, kur kam shku në shtëpi e kam mbushë me bateri dhe kur është ndezë në ekran ka dalë një fotografi e Shqipdonit. Familjarët më kanë thënë se personi që është në fotografi është duke u kërkuar. E kam telefonu dajën e tij, i kam thënë të vijë tek unë. E kemi telefonuar edhe policinë, bashkë me dajën dhe policinë kemi shku në vendin ku e kam gjetur telefonin dhe gjërat tjera, në afërsi të atij vendi policia e ka gjetë edhe trupin e pajetë të Shqipdonit”, ka thënë Limani.
Vendi ku dyshohet se u gjet trupi i pajetë i Shqipdonit
Ndërkaq policia ka bërë të ditur se trupi i pajetë i Shqipdonit është dërguar në Institutin e mjekësisë Ligjore për obduksion, nga ku edhe do të mësohen rrethanat e vdekjes së 24-vjeçarit.
Express mëson se obduksioni ka përfunduar dhe trupi i pajetë i viktimës i është dorëzuar familjes për të kryer ceremoninë e varrimit i cili do të bëhet sot. I ndjeri pas vetës ka lënë nënën dhe motrën 9-vjeçare.
