Veliu refuzon të jetë pjesë e listës së LDK-së

Agim Veliu ka thënë se refuzon të jetë pjesë e listës së Lidhjes Demokratike të Kosovës për zgjedhjet e parakohshme të 7 qershorit.

Veliu në arsyetimin e tij ka folur për “Bashkimin e madh”, e ku tha se në të po përfshihen të gjithë ata që u anatemuan dhe u eliminuan nga lideshpshipi aktual.

Ish-kryetari i Podujevës tha se para zgjedhjeve të 28 dhjetorit të vitit të kaluar, pati shprehur publikisht vullnetin të jetë pjesë e listës së kandidatëve për deputetë.

Por, tha se kryesia e Degës së Podujevës së LDK-së kishte refuzuar edhe të nxjerrtë në diskutim kandidaturën e tij dhe arsyetimi ishte “vendim i shefit të madh (Lumirit) të mos jem pjesë e garës”.

“Ndërsa sot e njëjta kryesi, me bekimin e shefit, më paska propozuar të jem në listën e kandidatëve për deputetë. Madje pa më kontaktuar dhe pa më konsultuar fare. Tash nuk di nëse paskam ndryshuar unë, apo ata? Jo. As unë, as ata. Kanë ndryshuar vetëm strategjitë për mbijetesën e tyre politike. Ka ndryshuar edhe motoja, të cilën e solli në LDK e rikthyera nga aventuara e saj pesë vjeçare në kampin majtist. Ajo, bashkë me Lumirin, mashtrimin dhe përdorimin e madh e ambalazhuan në “Bashkim të madh të djathtistëve”. Pikërisht për këto arsye, me respektin më të thellë për anëtarësinë e ndershme të LDK-së, deklaroj publikisht se refuzoj të jem pjesë e listës së kandidatëve për deputetë në zgjedhjet e 7 qershorit”, ka shkruar Veliu.

Ai ka thënë se nuk po largohet nga LDK-ja, por po refuzon të përdoret dhe të jetë pjesë e një projekti “që e largon partinë nga identiteti i saj institucional e shtetndërtues”.

“Jam i bindur se LDK do të çlirohet nga mentaliteti i OJQ-izimit politik dhe do të rikthehet në rolin e saj historik si forcë përgjegjëse shtetformuese. LDK është më e madhe se interesat meskine të dy njerëzve. Zoti e ruajt LDK-në!” – ka shkruar Veliu.

Të hënën Dega e LDK-së në Podujevë nominoi Veliun ndër të tjerë si kandidat për deputet. Vendimin e Degës e përshëndeti kryetari i LDK-së, Lumir Abdixhiku, duke thënë se është “një hap i mbarë në ndërtimin e bashkimit të madh”.