Vendimi i Qeverisë për targat, Selakoviç: Vuçiç do të takojë Listën Serbe, ditë të vështira për ne

Vendimi i Qeverisë së Kosovës për targat dhe kartat e identitetit ka indinjuara tej mase krerët institucional të Serbisë. Aq shumë sa që presidenti i Serbisë, Aleksandër Vuçiç, ka vendosur të takojë përfaqësuesit politik të serbëve nga Kosova, në këtë rast Listën Serbe.

Kështu të paktën ka deklaruar ministri i Punëve të Jashtme të Serbisë, Nikola Selakoviç. E në arsyetimin e tij se pse Vuçiç do t’i takojë përfaqësuesit e Listës Serbe, kryediplomati serb ka deklaruar se “Prishtina në ditët në vijim po përgatit ferrin për serbët në Kosovë”.

Megjithatë, sipas Selakoviç, shefi i tij në këso rraste “të vështira” gjithmonë ka arritur të gjejë një rrugë.

I pyetur se cila është rruga që do të ndjek Vuçiç në këtë rast, Selakoviç nuk ka dhënë shumë detaje.

“Situata është jashtëzakonisht e vështirë dhe e ndërlikuar duke pasur parasysh rrethanat ndërkombëtare dhe rajonale. Ne duhet të mbrojmë dhe ruajmë interesat tona shtetërore dhe kombëtare në Kosovë”, ka thënë Selakoviç.

Qeveria e Kosovës, në mbledhjen e 85-të kishte miratuar vendimin për të mundësuar regjistrimin e automjeteve me targa “RKS” për të gjitha automjetet e pajisura me targat ilegale, si dhe vendimin për kalimin e kufirit shtetëror nga qytetarët me dokumente personale të lëshuara nga autoritetet e Serbisë.

Vendimi në fjalë ishte kritikuar me tone të ashpra nga pala serbe.

Udhëheqësit serb, vendimin e kishin cilësuar si një presion dhe provokim të radhës ndaj serbeve të cilët jetojnë në Kosovë.

Për këtë ata kishin kritikuar edhe qasjen dhe heshtjen e Bashkimit Evropian.

Pas këtij vendimi, presidenti i Serbisë, Aleksandër Vuçiç, kishte refuzuar të takohet me kryeministrin e Kosovës, Albin Kurti, në kuadër të dialogut, i cili ishte paralajmëruar të mbahet në javën e dytë të korrikut.